भांगरभूंय | प्रतिनिधी
भारतान संवसारीक वन डे क्रिकेट सर्ती खातीर आपल्या 15 वांगड्यांच्या पंगडाची घोशणा केली. रोहित शर्मा पंगडाचो मुखेली आसतलो. सर्त 5 ऑक्टोबर ते 19 नोव्हेंबर मेरेन भारतांत चलतली. भारत आपली पयली मॅच 8 ऑक्टोबराक चेन्नय शारांत ऑस्ट्रेलिया पंगडा आड खेळटलो.
तंदुरुस्ती खातीर झुजपी विकेटकीपर बॅट्समन लोकेश राहुलाक पंगडांत सुवात मेळ्ळी. निवड समितीन सात बॅट्समन आनी चार अश्टतासांच्या खेळगड्यांची निवड केल्या. लोकेश राहुल हॅमस्ट्रींग दुखापतीक लागून फाटल्या कांय म्हयन्यां सावन पंगडांतल्यान भायर आसा. श्रीलंकेंत चालू आशिल्ले आशिया करंड क्रिकेट सर्ती खातीर ताची निवड जाल्या. पूण, ताणें अजून मेरेन एकूय मॅच खेळूंक ना.
निवड समितीन फास्ट बॉलर प्रसिद्ध कृष्णा दावखुरो बॅट्समन तिलक वर्मा आनी अणभवी विकेटकीपर बॅट्समन संजू सॅमसन हांकां पंगडांत सुवात दिवंक ना.
शुभमन गिल, विराट कोहली, श्रेयश अय्यर आनी सुर्यकुमार यादव हांची तज्ञ बॅट्समन म्हणून निवड केल्या. लोकेश राहुल आनी इशान किशन हांचो विकेटकीपर म्हणून आस्पाव केला. फास्ट बॉलिंगेची जापसालदारकी जसप्रीत बुमरा, मोहम्मद शमी, मोहम्मद सिराज आनी शार्दुल ठाकूर हांच्या भुजांचेर आसतली. स्पिन विभाग कुलदीप यादव साबाळटलो.
पंगडः रोहित शर्मा (मुखेली), हार्दिक पांड्या (उप मुखेली), लोकेश राहुल, शुभमन गिल, विराट कोहली, श्रेयश अय्यर, सुर्यकुमार यादव, इशान किशन, रवींद्र जडेजा, अक्षर पटेल, शार्दुल ठाकूर, जसप्रीत बुमरा, मोहम्मद शमी, मोहम्मद सिराज आनी कुलदीप यादव.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
