भांगरभूंय | प्रतिनिधी
ब्रिटीश राजवटी आड स्वराज्या खातीर तन, मन, धन आनी प्राणांचीय पर्वा करिनासतना रातदीस झटपी लोकमान्य टिळक ! तांची पुण्यतीथ आयज 1 आॅगस्टाक आमी मनयतात.
ब्रिटिशांचे गुलामगिरींतल्यान भारत देश मुक्त जावचो, लोकजागृती जावची म्हूण ते खूब लडले. तांणी आनी आगरकर हांणी केसरी आनी मराठा हीं सातोळीं काडलीं. ब्रिटीश सरकारान भारतीयांचेर खूब अत्याचार केले, ते लोकां सामकार हाडले. ताका लागून सरकारान टिळक, आगरकर हांकां चार म्हयने बंदखणींत घाले. तरीय ह्या दोगांयनीय आपलें काम चालूच दवरलें. भारतीय संघटीत जावचे म्हूण टिळक हांणी भौशीक गणेश उत्सव आनी शिवजयंती सुरू केली. ह्या माध्यमांतल्यान स्वातंत्र्यपूर्व काळांत लोकजागृताय केली.
1896 वर्सा प्लेगाची साथ पातळ्ळी, दुकळूय आयलो. तेन्ना भारतांत आपत्कालीन परिस्थिती निर्माण जाली. प्लेग आनी दुकळाक लागून मर आयिल्ल्या लोकांक सरकारा कडल्यान मजत मेळपाक जाय, हे खातीर टिळकांनी जागृताय केली. लेख बरयले. ह्या काळांतूय ब्रिटिश अधिकाऱ्यांनी भारतीयांचेर खूब अत्याचार केले. असोच एक निर्दयी अधिकारी रॅण्ड हाच्या अत्याचाराक लागून ताका फार मारून जिवेशीं मारलो. दुबावा वयल्यान टिळकाक परत बंदखणींत घाले.
ब्रिटीश सरकारा आड समाजीक असंतोष आनी राष्ट्रप्रेम निर्माण करपी ह्या म्हापुरुशाक भारतीय असंतोषाचे जनक अशें म्हणटाले. तांच्या तिखट लिखाणाक लागून तांचेर देशद्रोहाचो आरोप लावन तांकां म्यानमाराच्या मंडाले बंदखणींत घाडिल्ले. हे बंदखणींत तांणी गीतारहस्य ग्रंथ बरयलो. हे स वर्सांचे बंदखणी उपरांत तांची भलायकी सामकी इबाडली. 1 आॅगस्ट 1920 दिसा तांकां मरण आयलें.
गोविंद लोलयेंकार,
8208398699
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
