भांगरभूंय | प्रतिनिधी
भारताच्या दोनूय दादल्यांच्या आनी बायलांच्या हॉकी पंगडान राष्ट्रकूल खेळां सर्तीचे सेमी फायनलींत सुवात मेळयली. बायलांच्या गटांत भारतान कॅनडाक उमळशीक वाडोवपी मॅचींत 3-2 फरकान हारोवन निमाण्या चारांतली सुवात निश्चीत केली.
बायलांच्या पंगडान 2018तले गोल्डकोस्ट खेळां सर्तींत निमाण्या चारांनी सुवात निश्चीत केल्ली. पूण, त्या वेळार ताका कांश्या पदक चुकिल्लें.
जाल्यार दादल्यांच्या पंगडान कॅनडाकूच 8-0 अशा व्हडा फरकान हारोवन सेमी फायनलींतली आपली सुवात निश्चीत केली. मध्यांतरा मेरेन भारत 4-0 असो मुखार आशिल्लो. दुसऱ्या अर्दांत आनीक चार गोल केले. भारता वतीन हरमनप्रीत सिंग आनी आकाशदीप सिंग हाणें दरेकी 2 गोल केले. जाल्यार रोहिदास, ललित उपाध्याय, गुरजंत सिंग आनी मंदीप सिंग हाणें दरेकी एकेक गोल केलो.
गट पांवड्या वयले पयले मॅचींत भारतान दुबळ्या घाना पंगडाक 11-0 अशा व्हडा फरकान हारयिल्लो. पूण, दुसरे मॅचींत ताका इंग्लंडान 4-4 असो बरोबरींत आडायिल्लो. भारत आतां वेल्सा आड खेळटलो.
बायलांच्या गटांत सलीमा टेटेन तिसऱ्या आनी नवनीत कौरान 22व्या मिनटाक गोल करून 2-0 अशी आघाडी घेवन बरे स्थितींत आशिल्लो.पूण, कॅनडान उपरांत जबरदस्त प्रदर्शन करतना मॅचींत पुनरागमन केलें. ब्रायन स्टेयर्सान 23व्या मिनटाक आनी हना हॉन हिणें 39व्या मिनटाक गोल करून कॅनडाक 2-2 असो बरोबरींत हाडलो.
उपरांत भारतान निर्णायक गोल करून मॅच जिखून निमाण्या चारांतली सुवात निश्चीत केली.
वेटलिफ्टर लवप्रीत सिंगाक कांशें
भारताचो वेटलिफ्टर लवप्रीत सिंगान 109 कील वजन गटांत कांश्या पदक जिखलें. ताणें स्नॅचांत 163 आनी क्लीन अॅण्ड जर्कांत 192 कील वजन उखल्लें. अशे तरेन ताणें 355 कील वजन उखलून तिसरी सुवात मेळयली. वेटलिफ्टिंगेंत भारताचें हें णवें पदक थारलें.
कॅमरुनाच्या ज्युनियर गाद्जाक (361 कील) भांगरा पदक जाल्यार समाओच्या जॅक ओपिलोगीक (358 कील वजन) रुप्या पदक फावो जालें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
