भांगरभूंय | प्रतिनिधी
बॉलरांच्या दोळे दिपकावपी कामगिरी उपरांत शिखर धवन आनी शुभमन गिल हे जोडयेन भारताक जैत मेळोवन दिलें. झिम्बाब्वेन जैता खातीर दिल्ले 190 धांवड्यांची मोख ह्या दोगांच्या जबरदस्त बॅटिंगेक लागून भारतान 10विकेटी राखून मेळयली. दोगांयनी 21 वर्सां पयलींचो व्हड विक्रम लेगीत मोडलो.
स म्हयन्यांनी आंतरराष्ट्रीय क्रिकेटींत पुनरागमन करपी दीपक चहरान झिम्बाब्वेचो डाव सुरवातीकूच गडगडावन उडयलो. ते उपरांत प्रसिद्ध कृष्णा, अक्षर पटेल आनी मोहम्मद सिराज हांणी धक्कातंत्र कायम राखून येजमानाक निर्शेणी हाडली. पूण, रिचर्ड एनगाराव्हा आनी ब्रॅड इव्हान्स हांणी णववे विकेटी खातीर विक्रमी भागिदारी करून भारता मुखार आव्हानात्कम मोख उबी केली. दोगांयनी 49 बॉलांनी 70 धांवड्यांची भागिदारी केली. भारता आड झिम्बाब्वेन णववे विकेटी खातीर केल्ली ही वन डे क्रिकेटींतली सर्वोत्तम भागिदारी थारली. हाचे आदीं 1998त पॉल स्ट्रॅंग आनी व्हायटल हे जोडयेन 53 धांवड्यांची भागिदारी केल्ली. कृष्णान अखेरेक ही भागिदारी फोडली. ताणें एनगाराव्हाक बोल्ड केलो. अशे तरेन झिम्बाब्वेचो डाव 40.3 ओव्हरींनी 189 धांवड्यो केल्यो.
चहरान 27 धांवड्यांनी 3, कृष्णान 50 धांवड्यांनी 3 आनी पटेलान 24 बॉलांनी 3 विकेटी घेतल्यो. सिराजाक एक विकेट फावो जाली.
190 धांवड्यांचो फाटलाव करतना शिखर धवनान पयलेच ओव्हरींत दोन चवके मारले. ते उपरांत शुभमन गिलान धांवड्यांची गती कायम राखली. दोगांयनी 10 ओव्हरींनी 43 धांवड्यो केल्यो.
मजगतीं, धवनान वन डे क्रिकेटींत 6500 धांवड्यो पुर्ण केल्यो. ओपनर म्हणून हो टप्पो हुपपी तो भारताचो पांचवो ओपनर थारलो. ताचे आदीं सचिन तेंडुलकर,सौरव गांगुली, रोहित शर्मा आनी विरेंद्र सहवाग हांणी हो पराक्रम केला.
धवनान फाटल्या 22 डावांतलो 11वो अर्द शेंकडो पुर्ण केलो. जाल्यार गिलान फाटल्या चार डावांनी तिसरो अर्द शेंकडो नोंदयलो. तशेंच दोगांयनी वन डे क्रिकेटींत फाटल्या चार डावांनी तिसरे खेपे शेंकड्याची भागिदारी केली. धवनान 113 बॉलांनी 9 चवक्यांचे मजतीन नाबाद 81 धांवड्यो केल्यो. जाल्यार गिलान 72 बॉलांनी 10 चवके आनी एका सक्याचे मजतीन नाबाद 82 धांवड्यो केल्यो.
दोगांयनी पयले विकेटी खातीर नाबाद 192 धांवड्यांची भागिदारी केली. झिम्बाब्वे आड वन डे क्रिकेटींत भारताच्या ओपनरांनी केल्ली ही सर्वोच्च भागिदारी थारली. हे जोडयेन सौरव गांगुली आनी सचिन तेंडुलकर हाचो पराक्रम फाटीं घालो. तांणी 2001त 133 धांवड्यांची भागिदारी केल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
