भांगरभूंय | प्रतिनिधी
खबरां संस्था
दुबयः सुपर 4 फेरयेंतले सेगीत दुसरे मॅचींत हार खावची पडिल्ल्यान भारताचें आशिया कप सर्तींतलें आव्हान सोपपाचे वाटेर पावलां. श्रीलंकेन भारताचेर आपले सुपर फेरयेतलें मॅचींत 6 विकेटीनी जैत मेळयले. पथूम निशांका (52) आनी कुशल मेंडीस (57) ह्या ओपनरांनी 97 धांवड्यांची सलामी दिवन श्रीलंकेच्या जैताची ब्युनाद घातली आनी उपरांत कॅप्टन दासुन शनाका (33) आनी भानुका राजपक्षे (33) हे पांचवे नाबाद जोडयेन ताचेर जैताची कळस चडयलो.
निशांकान 4 चौके आनी 2 सक्यांनी 37 बॉलांत 52 आनी तितल्याच बॉलांत मेंडीसान 4 चौके आनी 3 सक्यांनी 57 धांवड्यो केल्यो. ही ओपनरांची जोडीच पंगडाक जैत मेळोवन दितली अशें दिसतालें. मात युजवेंद्र चहलान निशांकाक बोल्ड करून ही जोडी फोडली. रोखडेंच ताणे चरिथ आशलंकाक (0) कॅच आवट करून आनी आर आश्विनान धनुष्का गुणतिलका (1) आवट करून भारताच्या जैताची आस्त तयार केली. मात शनाका आनी राजपक्षेक बाद करपाक भारताच्या बॉलारांत जमलें ना. श्रीलंकेचें जैत दोन बॉलांत दोन धांवड्याचेर पावलें तेन्ना 20वे ओव्हरीच्या पांचव्या बॉलार ताका दोन आयत्यो बाय धांवड्यो मेळ्ळो आनी 6 विकेटीनी तांणी भारताक हारयलें. चहलान तीन विकेटी घेतल्यो मात ताचो भारताक उपेग जालो ना.
भारताच्यो 173 धांवड्यो
केएल राहुल (6) आनी विराट कोहली. (0) ही ओपनींग जाडी 13 धांवड्यांत बाद जाल्या उपरांत कॅप्टन रोहीत शर्मा आनी सूर्यकुमार यादव हांणी तिसरे विकेटी खातीर 97 धांवड्यांची भागिदारी करून भारताक 110चे बरे स्थितीत हाडल्या उपरांत भारताच्या बाकीच्या बॅट्समनांनी दिलशान मदुशंका, चमिका करुणारत्ने आनी दासुन शनाका सामकार हाराकिरी केल्ल्यान भारताचो डाव फकत 8 बाद 173 धांवड्यांत सोपलो. पाकिस्ताना आडचे मॅचींत 60 धांवड्यो करपी विराटान दिलशानान शून्याचेर क्लीन बोल्ड केलें दिलशानान 24 धांवड्यांत 3 विकेटी घेतल्यो, दासुका शनाका आनी करुणारत्नेन दकेरी दोन विकेटी घेवून भारतात वरचड जावपाक दिलें ना.
रोहितान कॅप्टनाक फावोशी खेळी करून 41 बॉलांत 72 धांवड्यो करून पंगडाक बरे स्थितींत हाडलें. ताणे 5 चौके आनी 4 सणसणीत सके हुबयले. रोहीत करुणारत्नेच्या बॉलार निशांकाच्या हातांत कॅच दिवन आवट जाल्या उपरांत सूर्यकुमार आवट जालो. ताणे 29 बॉलांत 34 धांवड्यो करून रोहिताक बरो वांगोड दिलो. 58 बॉलांत 97 धांवड्याची भागिदारी करपी ही जोडी फुटल्या उपरांत भारताचे पांच गडी 63 धांवड्यांत आवट जाले. हार्दिक पंड्या (17) आनी दीपक हुडा (3) अपेशी थारले. 164 धांवड्याचेर आठवी विकेट पडले उपरांत आर आश्विनान 7 बॉलांत 13 धांवड्यो केल्ल्यान भारताक 173 धांवड्यो करप शक्य जाले. ऋषभ पंत हे मॅचींतूय अपेशी थारलो. ताणे 13 बॉलांत फकत 17 धांवड्यो केल्यो.
रोहीत- सूर्यकुमार ही जोडी शनाकाक फोडले उपरांत भारताचे बाकीचे खेळगडे थारावीक अंतरान आपल्यो विकेटी दिवन पॅव्हेलियनांत परत आयले.
रोहिताचो आशिया सर्तींतलो विक्रम
सुरवेक बशिल्ल्या दोन धपक्यां उपरांत रोहीत शर्मान आशिया कप सर्तींतलो पयलो अर्द शेंकडो करून एक विक्रम केलो. ताणे तो करतना मास्टर ब्लॉस्टर सचीन तेंडुलकारान फाटीं उडयलें. आशिया कप सर्तींत सगल्यांत चड धांवड्यो करपाचो विक्रम आतां रोहिताच्या नांवार जाला. हाचे पयलीं तो तेंडुलकाराच्या नांवार आशिल्लो. सचिनान हे सर्तींत 971 धांवड्यो केल्ल्यो. रोहितान सर्तींतल्यो एक हजार धांवड्यो पुराय केल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
