भांगरभूंय | प्रतिनिधी
मुखेली रोहित शर्माचे आक्रमक बॅटिंगे नेटार येजमान भारतान दुसरे टी-20 मॅचींत ऑस्ट्रेलियेक 6 विकेटींनी हारयलो. ह्या जैतान भारतान माळेंत 1-1 अशी बरोबर मेळयली. तिसरी आनी निर्णायक मॅच आयतारा 25 सप्टेंबराक हैदराबादांत जातली.
पावसाक लागून मैदान ओलें आशिल्ल्यान मॅच दोन वरां उसरां सुरू जाली आनी दरेकी 8 ओव्हरींची केली. ऑस्ट्रेलियेन निर्धारीत 8 विकेटींनी 5 विकेटी वगडावन 90 धांवड्यो केल्यो. मॅथ्यू वेडान 20 बॉलांनी 43 धांवड्यो केल्यो. प्रत्युत्तर दितना भारतान 7.2 ओव्हरींनी 4 विकेटी वगडावन मोख मेळयली.
रोहितान 4 सक्यांचे मजतीन नाबाद 46 धांवड्यो केल्यो. भारतान 2017 उपरांत पयले खेपे घरच्या मैदानाचेर ऑस्ट्रेलियेक हारोवपाक येस मेळयलें.
भारतान आठवे ओव्हरीच्या पयल्या दोन बॉलांचेर सको आनी चवको मारून मॅच सोंपोवपी दिनेश कार्तिकान दोन बॉलांनी नाबाद 10 धांवड्यो केल्यो. ऑस्ट्रेलियेन पयली मॅच 4 विकेटींनी जिखिल्ली.
ते पयलीं भारताचें स्लॉग ओव्हरींतलें दुखणें जसप्रीत बुमरा पंगडांत येवन लेगीत कामय उरलें. दुखापतींतल्यान पुर्ण बरो येवपी बुमरान बरी बॉलींग घाली. पूण, अखेरचे ओव्हरींत हर्षल पटेलान 19 धांवड्यो दिवन बुमराचे यत्न फुकट घालयले.
वेडा खेरीत मुखेली अॅरोन फिंचान 15 बॉलांनी 31 धांवड्यो केल्यो. भारता वतीन अक्षर पटेलान 13 धांवड्यांनी 2 विकेटी घेतल्यो. ताक लागून एका वेळार ऑस्ट्रेलियेचो स्कोर 3 बाद 31 आशिल्लो. ते उपरांत वेड आनी स्टिवन स्मिथ (8) हांणी मेळून तीन ओव्हरींनी 44 धांवड्यो केल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
