भांगरभूंय | प्रतिनिधी
मुखेली सुर्याकुमार यादवाच्या (100) शेंकड्या नेटार भारतान येजमान दक्षीण आफ्रिका पंगडाक 106 धांवड्यांनी हारयलो. ह्या जैतान भारतान तीन टी-20 मॅचींची माळ 1-1 अशी बरोबरींत सोडयली. पयली मॅच पावसाक लागून रद्द करची पडिल्ली, जाल्यार दुसरी मॅच 5 विकेटींनी जिखिल्ली.
भारतान पयलीं बॅटींग करतना निर्धारीत 20 ओव्हरींनी 7 विकेटी वगडावन 201 धांवड्यो केल्यो आनी उपरांत दक्षीण आफ्रिकेचो डाव 13.5 ओव्हरींनी 95 धांवड्यांचेर सोंपयलो.
मुखेली सुर्यकुमार यादवाच्या शेंकड्या नेटार भारताक 200 मेरेन मजल मारप शक्य जालें.
सुर्यकुमार यादवान 56 बॉलांनी शेंकडो पुर्ण केलो. आंतरराष्ट्रीय टी-20तलो ताचो हो चवथो शेंकडो थारलो. ह्या शेंकड्या नेटार ताणें आंतरराष्ट्रीय टी-20 क्रिकेटींत सगल्यांत चड शेंकडे मारपी रोहित शर्मा आनी ग्लॅन मॅक्सवॅल हांचे वळेरेंत सुवात मेळयली. यशस्वी जयस्वालान 60 धांवड्यो केल्यो.
मदले ओव्हरींनी उत्कृश्ट बॅटींग केल्या उपरांत भारताच्या बॅट्समनांक डॅथ ओव्हरींनी धांवड्यांचो वेग वाडोवपाक जमलो ना. 17 आनी 18वे ओव्हरींत 25 धांवड्यो आयल्यो. निमाण्या दोन ओव्हरींनी भारत 211 वा 213 मेरेन मजल मारतलो अशें दिशिल्लें. पूण, 19वे ओव्हरींत नांद्रे बर्गर बरी बॉलींग घाली ताणें फकत स धांवड्यो दिल्यो. हे ओव्हरींत रिंकू सिंग लेगीत बाद जालो. रिंकू बाद जाल्ल्यान चेपण आयलें आनी निमाणे ओव्हरींत तीन विकेटी पडल्यो आनी फकत णव धांवड्यो आयल्यो. निमाण्या चार ओव्हरींनी भारतान 40 धांवड्यो केल्यो आनी चार विकेटी वगडायल्यो.
मजगतीं, फिल्डिंग करतना सुर्यकुमार यादव जखमी जालो. दुसरे ओव्हरीच्या तिसऱ्या बॉलाचेर रिजा हॅण्ड्रिक्सान एक्स्ट्रा कव्हरांत शॉर्ट मारलो. फिल्डिंग रपी सुर्यान बॉल शिमे भायर वचपा पसून आडायलो. पूण, बॉल आडायतना ताचो पांय कस जालो. ताका चलपाक लेगीत त्रास जावपाक लागले. ताचे गैरहाजेरेंत रवींद्र जडेजान फुडारपण केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
