भांगरभूंय | प्रतिनिधी
खबरां संस्था
दुबयः फाटल्या आयतारा आशिया कप सर्तीच्या उक्तावणाचे मॅचींत भारता कडल्यान जाल्ले हारीचो बदलो घेतना पाकिस्तानान भारताक 5 विकेटींनी हारयले तशेंच हे सर्तीच्या बाद फेरयतलें आपले आव्हान बळीश्ट केलें. मोहम्मद रिझवान (71) ह्या जैताचो हिरो थारलो. भारतान जैता खातीर दिल्लें 182 धांवड्याचें आव्हान रिझवानाचे बॅटिंगेक लागून तांणी 20वे ओव्हरींत पुराय केलें. 20 बॉलांत 6 चौके आनी 2 सक्यांनी 42 धांवड्यो करपी अश्टतासी मोहम्मद नवाजान जैतात म्हत्वाचें योगदान दिलें. विराट कोहलीन भारता खातीर केल्ली 60 धांवड्यांची खेळी निर्फळ थारली.
विराट कोहलीच्या 60 धांवड्याच्या बळग्यार आशिया कप सर्तीचे दुसरे वन-डे मॅचींत भारतान आपल्या डावांत 181 धांवड्यो करून आपलो पारंपरीक प्रतिस्पर्धी पाकिस्तानात जैता खातीर 182 धांवड्यो करपाचें आव्हान दिलें. मोहम्मद रिझवानान भुवनेश्वर कुमाराच्या पयले ओव्हरीच्या पयल्याच बॉलार चौको मारून ताका येवकार दिलो. ताच्या पांचव्या बॉलार कॅप्टन बाबर आझमान चौको मारलो आनी पाकिस्तानाक पयले ओव्हरींत 9 धांवड्यो मेळ्ळ्यो. बाबर आझम दुसरे वन-डेतूय अपेशी थारलो. हे खेपे रवी बिश्णोयचे फिरकीचेर रोहीत शर्मान कव्हरांत ताची कॅच घेतली. 10 बॉलांत दोन चौक्यांनी ताणे फकत 10 धांवड्यो केल्यो. 5 ओव्हरींत 36 धांवड्यो जाल्ल्यान जैता खातीर बाकीच्या ओव्हरीनी 9..7चे सरासरीन पाकिस्तानी बॅट्समनांक धांवड्यो करपाची गरज आशिल्ली. फॉर्मांत आशिल्ल्या रिझवानान हर्शदीप सिंगाक सको मारून जैताचे दिकेन पावलां घालपाक सुरवात केली. रिझवानाचो शॉट विराट आडावपाक शकलो ना आनी ताका चौको मेळ्ळो आनी 6.4 ओव्हरींत पाकिस्तानाच्यो 50 धांवड्यो जाल्यो. भुवनेश्वर, अर्शदीप आनी हार्दिकाक रिझवान आनी फरक जमान आयकनात हें पळोवन कॅप्टन रोहितान बिश्णोय आनी युजवेंद्र चहलाच्या हातांत बॉल दिलो आनी ताचो परिणाम दिसून आयलो. फकराक चहलान कोहलीच्या हातांत कॅच दिवपाक लायली. ताणे 18 बॉलांत दोन चौक्यांनी 15 धांवड्यो केल्यो. हार्दिक बॅटिंगेंत फेल गेलो आनी बॉलिंगूय ताची जाय तशी जाली ना. नवाजान ताका सको मारून धांवड्यो वाडोवपाक गती दिली. हार्दिकान घातिल्ले मॅचींतले 10 वे ओव्हरीत पाकिस्तानाच्यो 76 धांवड्यो जाल्यो. रिझवानान चहलाक सको मारून पंगडाक 82 धांवड्यांचेर व्हेलें. नवाजान बिश्णोयत सको मारून पंगडाक 95 धांवड्यार व्हेले उपरांत रिझवाना वांगडा ताणे 12.2 ओव्हरींत पंगडाचो शेंकडो पुराय केलो तशेंच रिझवानान 37 बॉलांत आपलो अर्द शेंकडोय पुरायक केलो. ते खातीर ताणे 4 चौके आनी 2 सके मारले. पाकिस्तानाची जैताचे दिकेन पावलां चल्ल्यांत हे ह्या वेळार दिसून येतालें. रिझवान नवाजान तिसरे विकेटी खातीर 62 धांवड्यांची भागिदारी हें दाखोवन दिलें. मात भुवनेश्वर कुमाराक व्हडलो फटको मारपाच्या यत्नांत महम्मद नवाजान दीपक हुडाच्या हातांत कॅच दिली. ही जोडी फुटल्ल्यान भारताच्या जैताची आस्त तयार जाली. 137 धांवड्याचेर पाकिस्तानाची तिसरी विकेट पडली. 17 वी ओव्हर चलताली तेन्ना पाकिस्तानाक जैता खातीर फकत 36 धांवड्यांची गरज आशिल्ली. हार्दिक पंड्याच्या उजवे विकेटी भायल्या बॉलार शॉट मारून रिझवानान सूर्यकुमार यादवाच्या हातांत सोपी कॅच दिली. ताणे 6 चौके आनी 2 सक्यांनी 51 बॉलांत 71 धांवड्यो केल्यो. ह्या वेळार मॅचीचें दालें भारता वटेन देंवलें. असीफ अलीची विकेटकीपर ऋषभ पंतान कॅच घेतली हे खातीर भारतान रिव्हू मागलो. मात तो तिरऱ्या अंपायरान भायरायलो. उपरांत असीफाची सोपी कॅच अर्शदिपान. ह्या वेळार ताका 13 बॉलांत 27 धांवड्यांची गरज आशिल्ली. भुवनेश्वर कुमाराक असिफान सको मारून जैत लागीं हाडलें. भुवनेश्वर कुमारान घातिल्ले 19वे ओव्हरीत मॅच भारताच्या हातांतल्यान गेली अशें दिसतनाच असीफ अली अर्शदीपच्या बॉलार एलबीडब्ल्यू जालो. मात इफ्तिकार अहमद आनी खुर्शीद शहान निमाणे जैताचे सोपस्कार पुराय केलेय
विराट कोहलीचो अर्द शेंकडो
भारताक पयलीं बॉलिंग करपाची आशिल्ली. मात कॅप्टन रोहीत शर्मा टॉस जिखपाक शकलो ना आनी अपेक्षे प्रमाण पाकिस्तानाचो कॅप्टन बाबर आझमान भारताक पयलीं बॅटिंग करपाक सांगलें. केएल राहुल आनी रोहीत शर्मान भारताच्या डावाक सुरवात केली. रोहितान नसीमाक पयले ओव्हरीच्या पांचव्या बॉलार चैको मारून आपलें खातें उग़़डलें आनी निमाण्या बॉलाचेर सको हुबोयलो. नसीमाचे दुसरे ओव्हरीच्या पयल्या बॉलार रोहिताक आनीक एक सको हुबयलो. आठ बॉलांत भारताच्या नांवार 27 धांवड्यो लागल्यो. रोहिताच्या पावलार पावल दवोरून राहुलान लेगीत नसीमाचे हे ओव्हरीच्या निमाण्या बॉलार सको मारलो. आपली दुसरी वन-डे मॅच खेळपी नसीमाच्या दोन ओव्हरींत भारताच्या ओपनरांनी 25 धांवड्यो काडल्यो. महम्मद नवाजाक चौको मारून राहुलान भारताचो धांवड्यांचो अर्द शेंकडो 4.3 ओव्हरींत पुराय केलो.
हॅरीस रौफाक सको मारपाच्या यत्नांत रोहितान खुर्शीदाच्या हातांत कॅच दिली. 16 बॉलांत 3 चौके आनी 2 सक्यांनी ताणे 28 धांवड्यो केल्यो. नाकाशिल्ली केल्ली घाई रोहिताक नडली. 54 धांवड्याचेर भारताची पयली विकेट पडली. केएल राहुल लेगीत 28 धांवड्यो करून परत आयलो. शदाब खानाक चौको मारप्याच्या यत्नांत ताणेय नवाजाच्या हातांत कॅच दिली. दोन सके आनी एका चौक्यान ताणे 20 बॉलांत 28 धांवड्यो केल्यो. भारताची ओपनींग जोडी फोडपा खातीर बाबर आझमान पांच बॉलरांचो वापर केलो. सूर्यकुमार यादव (13) लेगीत चौको मारपाच्या यत्नांत नवाजाच्या बॉलार असीफ अलीच्या हातांत कॅच दिवन परत आयलो. 93 धांवड्यो जायसर भारताच्यो तीन विकेटी पडल्यो. विराट कोहली आनी ऋषभ पंतान 10.4 ओव्हरींत भारताचो शेंकडो पुराय केलो. पंतान शदाबाक विकेटी फाटल्यान चौको मारून 13.4 ओव्हरींत भारताच्यो 125 धांवड्यो पुराय केल्यो आनी रिव्हर्स स्पीप मारपाच्या यत्नांत ताकाच आपली विकेट दिवन 14 धांवड्यो करून तो पॅव्हेलियनांत आयलो. असीफान ताची कॅच घेतली. फाटल्या आयतारा भारताक मॅच जिखून दिवपी हार्दिक पंड्या एकूय धांवडी करनास्तना मोहम्मद हसनेनच्या बॉलार नवाजाच्या हातांत सोपी कॅच दिवन आवट जालो. भारताची स्थिती ह्या वेळार 5 बाद 131 अशी जाली. विराट आनी दीपक हुडान 17.1 ओव्हरींत भारताच्यो देडेशें धांवड्यो पुराय केल्यो. क्रिकेटीच्या तिनूय फॉर्मेटांत 100 मॅची खेळपी विराट कोहलीन हसनेनाक चौको मारून आपलो अर्द शेंकडो पुराय करून आपूण परत फॉर्मांत आयलां हें क्रिकेट मोगींक दाखोवन दिलें. 32 बॉलांत 4 चौके आनी एका सक्यान ताणे 50 धांवड्यो करून भारताच्या आव्हानाक धार हाडली. पंगडाच्या 168 धांवड्याचेर हुडाची (16) नसीमाच्या बॉलार नवाजान बाऊंडरी कडेन कॅच घेतली. विराट कोहलीन एक बाजू लावून धरली मात दुसरे वटेन थारावीक अंतरान भारताच्यो विकेटी पडत गेल्यो. दुसरी धांवडी घेवपाच्या यत्नांत विराट कोहली रन आवट जालो. ताणे 44 बॉलांत 4 चौके आनी एका सक्यान 60 धांवड्यो केल्यो. ह्या वेळार भारताच्यो 173 धांवड्यो जाल्लो. निमाणे 2 बॉल खेलपा खातीर रवी बिश्णोय आयलो. ताची कॅच सुटून ताका 4 धांवड्यो मेळ्ळ्यो आनी भारताचो डाव 181 धांवड्यांत सोंपलो. शदाब खानान दोन, नसीम, हसनेन, रौफ आनी नवाजान दरेकी एक विकेट घेतली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
