भारतांतले आधुनीक कर्ण: दर दिसा दान करतात कोट्यांनी रुपया

भांगरभूंय | प्रतिनिधी

मुंबय, खबरां संस्था ः एचसीएल टेकचे संस्थापक शिव नाडर हांणी वर्सुकी 2,042 कोटी रुपयां दान करुन अंदूं देशांतल्या देणगी दिवपी लोकांच्या वळेरेंत पयलो क्रमांक मेळयला. तांणी दर दिसा सरासरी 5.6 कोटी रुपया दान दिलां. ह्या वर्सा देशभरांत 199 व्यक्तींनी 8,445 कोटी रुपया दान केलें, जें वित्तीय वर्स 2022 वर्सा 108 व्यक्तींनी दिल्ल्या देणग्यां परस 59 टक्के चड आसा. भारतांतल्या देणगीकारांची 2023 वर्साची (1 एप्रिल 2022 ते 31 मार्च 2023) वळेरी बिरेस्तारा ‘एडेलगिव्ह हुरून’ हांणी संयुक्त सर्वेक्षण उपरांत जाहीर केली.
देणगीकारांच्या मळार मुखार आशिल्ल्या म्हायती तंत्रज्ञान क्षेत्रांतल्या अग्रणी विप्रोचे अझीम प्रेमजी हे वळेरेंत दुसरे सुवातेर आसात. ताणें वर्सुकी 1,774 कोटी रुपयाचे दान केलां. देशांतले गिरेस्त वेवसायीक रिलायन्स इंडस्ट्रीजचे मुकेश अंबानी हांणी 376 कोटी रुपयांचे दान दिला. अंदूं जिरोधा कंपनीचे निखिल कामत हे वळेरेंतले सगळ्यांत तरणाटो दानी थारल्यात. वळेरेंत बाराव्या क्रमांकाचेर आशिल्ल्या कामत आनी तांच्या भावान एका वर्सात 110 कोटी रुपयांचें दान केलां.
रोहिणी नंदन निलेकणीन फाटल्या वर्सा 170 कोटी रुपयांची देणगी दिली. ती हे वळेरेंत धाव्या क्रमांकाचेर आसा. ताचे उपरांत अनु आगा (40 वे सुवातेर) आनी लीना गांधी (41वे सुवातेर) हांणी दरेकीं 23 कोटी रुपया दान केल्यात. वट्ट सात बायलां समाजसेवकांचो हे वळेरेंत आस्पाव आसा.
अंदूं भारतांतल्या वट्ट 14 व्यक्तींनी 100 कोटी रुपयां परस चड, 24 व्यक्तींनी 50 कोटी परस चड आनी 47 व्यक्तींनी 20 कोटी रुपयां परस चड देणगी दिली अशें हुरुनान तयार केल्ले वळेरेंतल्यान स्पश्ट जाला.

खंयच्या मळार कितलें योगदान?

शिक्षणाच्या मळार 62 लोकांनी एकठांय येवन 1,547 कोटी रुपया देणगी दिलां. ताचे उपरांत कला मळार 1,345 कोटी रुपया आनी भलायकी सेवे खातीर 633 कोटी रुपया देणगी दिला. देणगीकारांनी एकठांय येवन 2020 वर्साच्या अर्थीक वर्सा 11,984 कोटी रुपया दान दिले. जे 2021 वर्साच्या वित्तीय वर्सा 14,755 कोटी रुपया आशिल्ले. पूण फाटल्या वर्सा ते 8,445 कोटी रुपया मेरेन मर्यादीत उरले.

मुंबय मुखार…

देशांतल्या चड देणगीकारांच्या वळेरेंत मुंबय मुखार आसा आनी दान केल्ल्या मदले 39 लोक मुंबयचे आसात. उपरांत नवी दिल्ली 19 टक्क्यांनी दुसरे आनी बेंगळुरू १३ व्यक्तीं सयत तिसरे सुवातेर आसा. कुमार मंगलम बिर्ला, गौतम अदानी, बजाज कुटुंब, अनिल अग्रवाल, नंदन निलेकणी आनी सायरस आनी अदार पूनावाला हांचो पयल्या 10 देणगीकारां मदीं आस्पाव आसा. नंदन निलेकेणी आनी निखील कामत हे दोगूय कोंकणीभाशक.