भांगरभूंय | प्रतिनिधी
भांगरभूंय । प्रतिनिधी
म्हापशेंः राज्य सरकारान शेताची मळणी करपा खातीर थारावय दिल्ल्या दरा परस मळणी मशीनदार शेतकारां कडल्यान चड पयशे घेतात. सरकारान एक दर निश्चीत करून शेतकारांचे अर्थीक लुकसाण जावपाक दिवचें न्हय अशी मागणी नास्नोळें शेतकार संघटनेन केल्या. हे मागणेचें निवदेन संघटनेचो अध्यक्ष विठ्ठल नायक आनी तांच्या पदाधिकाऱ्यांनी म्हापशेंच्या विभागीय कृशी अधिकारी संपत्ती धारगळकार हिका सादर केलां. तांचो प्रती मुख्यमंत्री, कृशी मंत्री, आमदार आनी कृशी खात्याक धाडल्यात.
भात मळणे खातीर अनुदान मेळटा त्या मशिनाचो वापर केल्यार उत्पादन खर्च उणो जातलो अशें दिसतालें. मात हें मळणी मशीन उपलब्द करून दिवपी शेतकारां कडल्यान चड पयशे घेतात. शेतकारांनी केल्ले अपेक्षे पसर कितले तरी पटीन हो दर चड आशिल्ल्यान उत्पादन खर्च कमी जावपाची शक्यताय ना अशें संघटनेन आपल्या निवेदनांत म्हणलां.
मळणीचो दर निश्चीत केल्यार शेतकारांचो लुकसाण जावचें ना. तशेंच वेवसायीक नदरेन शेत करप परवडटले अशें तांणी म्हणलां. मळणी मशीन भाड्यान घेतल्यार तीं कार्यक्षम तशेंच परवडटा अश्या दरांत मेळपाक जाय. आधुनीक तंत्रगिन्यानाचो वापर करपाक शेतकारांक तयार करपा खातीर तांकां हे गिन्यान सवाय दरांत मेळपाक जाय अशें विठ्ठल नायक हांणी सांगलें.
गोंयांतली शेत जमीन खाजन जमीन आशिल्ल्यान तातूंत चड चिखोल आसता. थारावन दिल्ल्या वरांत मळणी करप ताका लागून शक्य जायना. वेळ चड लागल्यार मशिनवाले दुपेटीन दर घेतात. पयश्यांचे पावतेंत फेरफार करून शेतकार तशेंच सरकाराची फटवणूक करतात. ताका लागून सरकारान ही येवजण पारदर्शक करची अशी मागणी शेतकार संघटनेन केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
