भाडेकरू पडताळणी कायद्याची प्रक्रिया सुरू

भांगरभूंय | प्रतिनिधी

भांगरभूंय I प्रतिनिधी
पणजी : गोंयांत भाडेकरू पडताळणी कायद्याची मागणी गोंय पुलिसांनी सरकारा कडेन केल्ली. ते विशींची प्रक्रिया राज्य सरकारा कडल्यान सुरू आसा, अशी म्हायती पुलीस म्हासंचालक डॉ. जसपाल सिंग हांणी शेनवारा पत्रकारां कडेन उलयतना दिली.
विवीध राज्यांतले नागरीक रोजगारा खातीर गोंयांत येतात. ते थळाव्यांच्या घरांच्या भाड्यान रावतात. अशा नागरिकांची आधारकार्डां तशेंच हेर म्हायती घर धनयांनी लागसारच्या पुलीस स्टेशनांत दिवप गरजेचें. हाचे मुखार जे घर धनी भाडेकरूंंची म्हायती पुलिसांक दिनात, तांचेर कायद्या प्रमाण कारवाय करपा खातीरूच भाडेकरू पडताळणी कायद्याची अंमलबजावणी करची, अशी मागणी पुलीस खात्यान सरकारा कडेन केल्या. हे विशींची प्रक्रिया सुरू आसा, अशें पुलीस म्हासंचालकांनी सांगलें.
पुलिसांनी कांय म्हयन्यां पयलीं भाडेकरूंची म्हायती मेळोवपाची मोहीम राबयिल्ली. हे मोहिमे खाला जानेवारी पसून आतां मेरेन 37 हजार जाणांनी अर्ज भरून दिल्यात. हे मोहिमेक नागरिकां कडल्यान प्रतिसाद मेळूंक ना, अशेंय तांणी नमूद केले.