भांगरभूंय | प्रतिनिधी
मार्केटा सयत शार बंद करपाची म्हापशेंच्या वेपाऱ्यांची शिटकावणी
भांगरभूंय । प्रतिनिधी
म्हापशें: दुकानांचें भाडें वाडोवपाच्या निर्णयाक म्हापशें बाजारांतल्या वेपाऱ्यांनी खर विरोध केला. दुकानांच्या करारपत्रांचें नुतनीकरण करिनासतना दुपेटीन भाडेंवाडीचो थाराव खंयच्या आदाराचेर घेतला? हो निर्णय फुडल्या आठ दिसां भितर फाटी घेयात ना जाल्यार बाजारा सयत पुराय म्हापशें शार बंद करतले, अशी शिटकावणी वेपारी संघटणेन नगराध्यक्षांक दिल्या.
बिरेस्तारा म्हापशें वेपारी संघटणेच्या शिश्टमंडळान नगराध्यक्ष प्रिया मिळाश हांची भेट घेवन दुकान भाडेवाडीच्या निर्णयाक हरकत घेतली. तशेंच तांकां आपल्या मागण्यांचें निवेदन सादर केलें. वेपारी संघटणेच्या ह्या शिश्टमंडळांत अध्यक्ष श्रीपाद सावंत, सचीव सिद्धेश राऊत, भांडारी जितेंद्र फळारी आनी हेर पदाधिकारी तशेंच वांगडी व्हड संख्येन हाजीर आशिल्ले. तशेंच ह्या वेळार उपनगराध्यक्ष विराज फडके, पालिका मार्केट समितीचे अध्यक्ष आशीर्वाद खोर्जुवेंकार हाजीर आशिल्ले.
हालींच दाल्ले म्हापशें पालिका मंडळाचे बसकेंत पालिकेची स्थावर मालमत्ता आशिल्ल्या बाजारांतल्या दुकानांची भाडेवाड भौशीक बांदकाम खात्याच्या दरा प्रमाण करपाचो थाराव घेतलो. हो नवो दर 152 रुपया वयल्यान 296 रुपया दर चौखण मिटर केला. हे दरवाडीक म्हापशें वेपारी संघटणेन खर विरोध केला.
हो निर्णय फाटीं घेवचे खातीर संघटणेन पालिकेक आठ दिसांची मुजत दिल्या. ह्या काळांत पालिकेन आपल्या निर्णयाचो फेरविचार केलो ना जाल्यार मार्केटा सयत पुराय म्हापशें शार बंद करपाचो, तशेंच पालिका कार्यालयांत थपकल मारपाचो निश्चेव केला.
संघटणेचे अध्यक्ष श्रीपाद सावंत हांणी सांगलें, हे आदीं खूब खेपे पालिकेन दुकानांचें भाडें वाडयलां. आतां नव्या दराक लागून आमची कमरूच मोडटली. वेपारी वर्ग मार्केटाचो मुख्य भागधारक आसून लेगीत आमकां विस्वासांत घेनासतना आपलेआपूण दरवाडीचो निर्णय घेवप चुकीचें आसा. पालिका मार्केटाचें बांदकाम हें पुर्तुगेज काळांतलें आसा. म्हापशें पालिकेन विकसीत केल्ल्यो चडश्यो वेवसायीक सुवातो वेपाऱ्यां वांगडा स्वयं- वित्त येवजणे खाला बांदिल्ल्यो.
सिद्धेश राऊत हांणी सांगलें, फाटलीं कितल्याशींच वर्सां पालिकेन मार्केटाची गरजेची देखभाल करूंक ना. रंगूय मारूंक ना आनी दुरुस्तीय केल्ली ना. मार्केटांत शौचालय, पार्कींग ह्या मुळाव्या सुविधांचो उणाव आसा. पालिका मंडळान फक्त स्वताचे महसूलवाडीचेर भर दिला. मार्केटांत बऱ्यो सुविधा दिवपाक पालिका अपेशी थारल्या. सध्या मार्केटांत गिरायक उणे आसात. गिरायकांचे वाडी खातीर पालिकेन ठोस उपाय येवजण्यो चालीक लावंक नात. तशेंच भाडेंकरूंच्या करारपत्रांचें नुतनीकरण करिनासतना पालिका मंडळान भाडेवाडीचो निर्णय घेतलोच कसो, असो प्रस्न तांणी उपस्थीत केलो.
रस्त्या वयल्यो लायटी वेवस्थीत पेटनाशिल्यान मार्केटांत रातच्या वेळार काळोख आसता. सीसीटीव्ही कॅमेरे वेवस्थीत चलनात. रस्त्यांची आनी गटारांची आवतिकाय जाल्या, अशें संघटणे वतीन गितेश डांगी हांणी सांगलें.
निर्णय तीन म्हयने फाटीं घेवपाक मेळना
पालिका मंडळान एकदां घेतिल्लो थाराव वा निर्णय तीन म्हयने फाटीं घेवपाक मेळना. ते मेरेन तो स्थगीत दवरपाक मेळटा. दर धा वर्सांनी भौशीक बांदकाम खात्या वतीन जीएसआर प्रमाण (गोवा शेड्यूल रेट) नवो भाडेंदर थारायतात, पूण त्या दराची अंमलबजावणी करपाचें पालिका मंडळाक बंधन ना. सरकारा वतीन नगरविकास खात्यान निर्देश दिले जाल्यारूच हो दर पालिकांक लागू करप सक्तीचो आसता, अशें वेपारी संघटणेन म्हणलां.
भाडेंवाडीचो निर्णय हो पालिका मंडळाचे बसकेंत घेतला. तो तत्काळ फाटीं घेवप शक्य ना. ते खातीर पालिका मंडळाची विशेश बसका घेवन ताचेर निर्णय घेतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
