भांगरभूंय | प्रतिनिधी
भाटीकार मॉडेल हायस्कुलान 20वी मुकूंद त्रिखन्नाड 16 वर्सां पिराये सकयले आंतर शालेय क्रिकेट सर्तीचें वस्तादपण जोडलें. मडगांवच्या राजेंद्र प्रसाद स्टेडियमाचेर जाल्ले फायनलींत ताणें सां जुझे दी आरियलाच्या किंग्स हायस्कुलाक 10 विकेटींनी हारयलें.
पयलीं बॅटींग करतना किंग्स हायस्कुलान 39.3 ओव्हरींनी 215 अशी धांवसंख्या उबारली. वेंकट चिगुरुपतीन 50 जाल्यार आराध्य गोयलान 36 धांवड्यो केल्यो. भाटीकार मॉडेल हायस्कुला वतीन शंतनू नेवगीन सगल्यांत चड 4 विकेटी घेतल्यो. ओम नायकान एक विकेट मेळयली.
भाटीकार मॉडेल हायस्कुलान यश कसवणकाराच्या नाबाद 107 आनी शंतनू नेवगीच्या नाबाद 81 धांवड्यां नेटार 10 विकेटींनी सोंपें जैत जोडलें. दोगांयनी पयले विकेटी खातीर नाबाद 216 धांवड्यो केल्यो.
शंतनू नेवगीची मॅन ऑफ द मॅच आनी सर्तींतलो उत्कृश्ट बॉलरा खातीर निवड जाली. दामोदर विद्यालय इंग्लीश हायस्कुलाच्या निसर्ग नागवेंकाराची सर्तींतलो उत्कृश्ट बॉलर म्हणून निवड जाली.
इनामां भेटवण सुवाळ्याक मुखेल सोयरे म्हणून मडगांवचे आमदार दिगंबर कामत उपस्थीत आशिल्ले. तशेंच भारताच्या क्रिकेट पंगडाचे आदले बॅट्समन प्रवीण आम्रे, सर्त पुरस्कर्ते दिनेश त्रिखन्नाड आनी गोंय क्रिकेट असोसिएशनाचे सचीव रोहन देसाय हे उपस्थीत आशिल्ले.
इनामां भेटवण सुवाळ्याचें निमित्त सादून अंदूंचे रणजी हंगामांत उत्कृश्ट प्रदर्शन केल्ले खातीर रणजी खेळगडो मोहित रेडकाराचो दिगंबर कामतीन भोवमान केलो.
मडगांव क्रिकेट क्लबाचे सचीव आदित्य आंगलेन सुत्रसंचालन आनी उपकाराचें उलोवप केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
