भाजपान बायलांक केलें आत्मनिर्भर

भांगरभूंय | प्रतिनिधी

डॉ. प्रमोद सावंत: म्हापश्यां अस्तंत विभागाची महिला मोर्चा वतीन बसका

म्हापशें: बायलांक आत्मनिर्भर, तांकां अर्थीक नदरेन घटमूट करपाचें काम भाजपान केलां. प्रधानमंत्री नरेंद्र मोदी हांच्या फुडारपणा खाला भाजप सरकारान खऱ्या अर्थान बायलांच्या कल्याणा खातीर येवजण्यो राबयल्यात अशें मुख्यमंत्री डॉ. प्रमोद सावंत हांणी सांगलें.

मंगळारा म्हापश्यां भाजपाच्या जिल्हो कचेरेंत महिला मोर्चा वतीन अस्तंत विभागा खातीर आयोजीत केल्ले बसकेंत मुख्यमंत्री उलयताले. गोंय, महाराष्ट्र, दमण, गुजरात आनी मुंबय हांगासरल्यो महिला मोर्चा अध्यक्ष, सचीव तशेंच पदाधिकारी हे बसकेंत हाजीर आशिल्ल्यो.

हे बसकेंत येता ते लोकसभा वेंचणुके खातीर पक्षाच्या महिला कार्यकर्त्यांचो खंयचो आराखडो आसचो हे नदरेन विचार विनिमय केलें. ह्या वेळार महाराष्ट्रांतल्या राष्ट्रवादी काँग्रेसीच्यो आदल्यो महिला पदाधिकारी सोनाली मोहिले हांकां मुख्यमंत्री डॉ. प्रमोद सावंत हांणी पक्षांत प्रवेश दिलो.

ह्या वेळार महिला मोर्चाच्यो राष्ट्रीय सरचिटणीस दीप्ती रावत, गोंय महिला मोर्चा अध्यक्ष सुलक्षणा सावंत, महाराष्ट्राच्यो चित्रा वाघ, दमणच्यो सिंपल कटेला, गुजरातच्यो दीपीका सरदवा, मुंबईच्यो शितल देसाय आनी आरती बांदोडकार माचयेर हाजीर आशिल्ल्यो.

मुख्यमंत्री सावंत हांणी मुखार उलयतना म्हणलें, लोकसभेंत आनी राज्यांच्या विधानसभांनी बायलांक 33 टक्के आरक्षण दिवपी नारीशक्ती वंदन कायदो 2023 हें दुरुस्ती विधेयक आसूं वा तीन तलाक विधेयक, हीं विधेयकां हाडून मोदी सरकारान बायलांक आत्मसन्मान आनी न्याय दिवपाचें काम केलां.

भाजप सरकारान वेळावेळार बायलां खातीर केंद्रीय येवजण्यो राबोवन, बायलांक ताठ मानेन जिवन जगपा खातीर प्रोत्साहीत केलें. हाचे पयलीं काँग्रेस सरकाराच्या 70 वर्सांत हें केन्नाच जावंक नाशिल्लें. येता त्या शेनवारा प्रधानमंत्री नरेंद्र मोदी हांचे हस्तुकीं देशांत महिला बचत गटां खातीर आशिल्लो भोंवपी निधी वितरीत करतले अशें डॉ. सावंत हांणी म्हणलें.

चित्रा वाघ हांणी म्हणलें, मोदी सरकारान बायलां खातीर हाडिल्ल्या नारीशक्ती वंदन विधेयकाची अंमलबजावणी येता ते लोकसभा वेंचणुके उपरांत जातली. म्हारगायेचो मुद्दो हो फक्त राजकी मुद्दो आसून विरोधकां कडल्यान ताचो वापर करतात.

दीप्ती रावत हांणी म्हणलें, येता ते लोकसभा वेंचणुकेचे फाटभुंयेर अस्तंत विभागांतल्या महिला पदाधिकाऱ्यां सयत महिलांच्या विशयांचेर बसकेंत चर्चा जाली. भाजपाची देशभरांतल्या वेंचणुकांनी जी येसस्वी कामगिरी आसा तातूंत बायलांच्या मतांचो लक्ष ओडपी वांटो आसा. येता ते वेंचणुके वेळार, खेळ, लेखक, कवियत्री, एनजीओ, ट्रान्सजेंडर ह्या सारक्या विवीध मळा वेल्या बायलांक पक्षा कडेन जोडून घेवपाचें काम करतले. तशेंच चडांत चड बायलां म्हऱ्यांत पावपा खातीर खेळां महोत्सव घडोवन हाडटले.