भांगरभूंय | प्रतिनिधी
पणजीः भाजपा सरकारान जाती धर्माचेर राजकारण केल्लें ना. आमी सगळ्यांत आदीं गोंयकार. सगल्या अल्पसंख्यांक लोकांच्यो समस्या सोडोवप हें आमचें काम, अशें मुख्यमंत्री डॉ. प्रमोद सावंत हांणी सांगलें.
शेनवारा गोंय मुस्लीम जमात असोसिएशनाच्या पदाधिकाऱ्यांनी मुख्यमंत्र्यांची आल्तिना वयल्या सरकारी बंगल्यार भेट घेतली. ह्या वेळार तांणी मडगांवच्या कब्रस्थानाची समस्या सोडयिल्ले खातीर उपकार मानले. ह्या वेळार ह्या असोसिएशनाचे सचीव शेख रियाझ, भाजपाचे अल्पसंख्यांक मंडळाचे अध्यक्ष उर्फान मुल्ला आनी हेर वांगडी हाजीर आशिल्ले.
गोंयांत सगल्या धर्मांचे लोक एकचारान रावतात. आमी सर्वधर्म समभाव हो मंत्र घेवन फुडें वतात. अल्पसंख्यांकांक ज्यो समस्या आसात त्यो भाजपा सरकार सोडयतलो. कब्रस्थानाचो विशय सोडोवपाचें आमी तांकां आस्वासन दिल्लें, ते प्रमाण तांची ही समस्या सोडयल्या. तांच्या आनीक हेर विवीध मागण्यो आसात, त्यो लेगीत सोडयतले. तातूंत कसलोच भेदभाव करचे नात, अशेंय मुख्यमंत्र्यान सांगलें. भाजपा खऱ्या अर्थान सगल्या जाती धर्मांचें हीत सांबाळटा. कांय लोक गरजे भायर सोशल मिडियाचेर सरकाराचेर जाती धर्मा वयल्यान आरोप करतात. जे लोक देश विरोधी कारवाय करतात तांचे आड आमी आसात. भाजपा सरकारान आमच्यो खूबश्यो मागण्यो मान्य केल्यात. आमच्या धर्माचे खूबशे लोक सरकारी नोकरी करतात. ह्या सरकारान आमकां केन्नाच अल्पसंख्यांक म्हूण उणाक लेखूंक ना. मुख्यमंत्री डॉ. प्रमोद सावंत हांकां तशेंच भाजपा सरकाराक गोंयांतल्या मुस्लीम समाजाचो पुराय तेंको आसा, अशें उर्फान मुल्ला हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
