भांगरभूंय | प्रतिनिधी
मुख्यमंत्री डॉ. प्रमोद सावंतः पं. दीनदयाळ उपाध्याय हांचे जिणे वयल्या पुस्तकाचें प्रकाशन
भांगरभूंय । प्रतिनिधी
पणजीः पं. दीनदयाळ उपाध्याय हांच्या विचारांतल्यान जनसंघ आनी भाजपा सुरू जाली. एकात्मता, मानवता आनी अंत्योदय ह्या दोन तत्वांचेर भाजपा चलता. काळा प्रमाण भाजपाचे फुडारी बदल्ले तरीय तत्वां बदलूंक नात, अशें मुख्यमंत्री डॉ. प्रमोद सावंत हांणी सांगलें.
पणजे भाजपा कार्यालयांत पं. दीनदयाळ उपाध्याय हांचे जयंती निमतान आर्गां ओंपलीं. ह्या वेळार डॉ. भूषण भावे हांणी कोंकणींत अणकार केल्ल्या पं. दीनदयाळ हांचे जिणेचेर आदारीत पुस्तकाचें प्रकाशन केलें. ह्या वेळार मुख्यमंत्र्यां सयत प्रदेशाध्यक्ष सदानंद तानावडे, राष्ट्रीय सचीव विजया राहतकर, पुस्तकाचे मूळ लेखक डॉ. नितीन खर्चे, दामू नायक, डॉ. भूषण भावे आनी हेर पदाधिकारी हाजीर आशिल्ले.
उपाध्याय हांचे विचार आतां कोंकणींतल्यान वाचकांक वाचपाक मेळटले. उपाध्याय हांच्या विचारांतल्यान खूबशे राजकारणी घडल्यात. अजून तांचे विचार, तत्वां देशभरांतले भाजपा फुडारी पाळटात. तरणाट्यांनी उपाध्याय हांचे जिणेंतल्यान प्रेरणा घेवन समाजांत बरें काम करचें, अशें मुख्यमंत्री डॉ. सावंत हांणी सांगलें.
गोंयांत भाजपा सुरू करतना आदले मुख्यमंत्री मनोहर पर्रीकार तशेंच केंद्रीय मंत्री श्रीपाद नायक अशा साबार फुडाऱ्यांनी मोलाचें योगदान दिलां. सुरवेक जरी भाजपाक हार खावची पडली तरीय आयज कितलीशींच वर्सां गोंयांत भाजपाचें सरकार सत्तेर आसा. गोंयांत सध्या भाजपा सगळ्यांत व्हड राजकी पक्ष जाला, अशें मुख्यमंत्री डॉ. सावंत हांणी सांगलें.
पं. दीनदयाळ उपाध्याय हांचे जिणे वयल्या पुस्तकांत तांचे विचार, तांणी दरेके गजाली खातीर दिल्लो लडो आनी जिणेंतले खूबशे बरे वायट प्रसंग प्रभावी तरेन मांडल्यात. तांणी भुरग्यापणांतल्यानूच संघाचें काम केलें. उपरांत तांणी जनसंघाचें महामंत्रीपदूय सांबाळ्ळें. पयलीं राष्ट्र, उपरांत पक्ष आनी ते उपरांत आपूण हो विचार तांणी दरेका कार्यकर्त्यां मदीं रुजयलो, हें म्हत्वाचें आसा, अशें सदानंद तानावडे हांणी सांगलें.
ह्या वेळार हाजीर आशिल्ल्या हेर मानेस्तांनी आपले विचार मांडले. गोरख मांद्रेंकार हांणी सुत्रसंचालन केलें.
अंत्योदय तत्वाचेरूच कार्यकर्त्यांचो वावरः मुख्यमंत्री
केंद्र सरकाराच्यो खूबश्यो येवजण्यो आसात. आयज देशभरांतल्या खाचीकोनशांनी त्यो पावतात. ताका लागून खूबशे लोक भाजपा कडेन जुडल्यात. प्रधानमंत्री नरेंद्र मोदी हांणी चालीक लायिल्ली दरेक येवजम अंत्योदय तत्वाचेरूच आदारिल्ली आसा. प्रधानमंत्री मोदी हांकां गरिबी, मानववाद हाची जाणीव आसा. ताकाच लागून सगळ्यांक समान हक्क मेळचो हे खातीर ते वावुरतात. भाजपाचो दरेक कार्यकर्तो अंत्योदय तत्वाचेरूच काम करता, अशें मुख्यमंत्री डॉ. प्रमोद सावंत हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
