भांगरभूंय | प्रतिनिधी
केतन भाटीकारः भाजपा फुडाऱ्यांनी चलयल्यात यत्न
भांगरभूंय । प्रतिनिधी
फोंडें: फोंडें मतदारसंघांत फाटले विधानसभा वेंचणुकेंत हारिल्ले मगो उमेदवार केतन भाटीकार हांकां भाजपांत प्रवेश दिवचे खातीर भाजपा फुडाऱ्यांनी नेटाचे यत्न चलयल्यात. फोंडें पालिकेच्यो वेंचणुको आनी लोकसभा वेंचणूक दोळ्या मुखार दवरून केतन भाटीकार हांकां भाजपांत प्रवेश दिवपाची शक्यताय आसा. पूण भाटीकार हांणी भाजपांत प्रवेश करपाचो प्रस्नूच येना अशें सांगून भाजपा प्रवेशाची खबर न्हयकारली.
फोंडें मतदारसंघांत 2017 सावन भाटीकार विवीध समाज वावरांत सक्रीय आसा. तांकां भाजपांत घेवपा खातीर भाजपा फुडाऱ्यांनी यत्न सुरू केल्यात. दिल्ली तशेंच गोंयांतल्या भाजपाच्या ज्येश्ठ फुडाऱ्यांनी केतन बाटीकार हांचे कडेन संपर्क करून भाजपा प्रवेशा संबंदांत चर्चा केल्ल्याची चर्चा चल्ल्या. ताका लागून लोकसभा वेंचणुके आदी भाटीकार भाजपावासी जावपाची शक्यताय फोंडें वाठारांत उक्तायतात. फुडल्या वर्सा एप्रील- मे म्हयन्यांत फोंडें पालिकेची वेंचणूक जावपाची आसा. हे आदीं भाटीकार हांणी कुर्टी खांडेपार पंचायत तशेंच फोंडें पालिकेंत मगो पक्षाचे उमेदवारांक जिखून हाडपाक म्हत्वाचें योगदान दिलां. भाजपा प्रवेशा संबंदांत केतन भाटीकार हांकां विचारलें जाल्यार तांणी ही खबर भायर मारली. कार्यकर्त्यांच्या कामां खातीर भाजपा फुडाऱ्यां कडेन तशेंच मंत्री- आमदारांक संपर्क करचो पडटा. सध्याच्या सरकारांतले सगळे मंत्री बरो आदार करतात. फोंडें वाठारांतल्या लोकांचीं कामां करपा खातीर भाजपा सयत काँग्रेस आनी अपक्षा आमदारां वांगडा आपले बरे संबंद आसात. मगो पक्षाचे फुडारी आनी सध्याचे वीज मंत्री सुदिन ढवळीकार हांच्या मार्गदर्शना खाला फाटल्लया कितल्याच वर्सां सावन फोंडें मतदारसंघांत काम करता. ताका लागून भाजपांत प्रवेश करपाचो प्रस्नूच येना, अशें भाटीकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
