भांगरा वस्ती फारावपी आंतरराज्य टोळयेक अटक

भांगरभूंय | प्रतिनिधी

पणजे एका ज्वेलरी शोरूमांतल्यान फारायिल्ले 4.53 लाखांच्यो वस्ती

भांगरभूंय प्रतिनिधी
पणजी : एका नामनेच्या ज्वेलरी शोरूमांत भांगरा खरेदी करपाच्या निमतान दोगां बायलांच्या टोळयेन 4.53 लाख रुपया मोलाच्यो भांगरा वस्ती फारायल्यो. ह्या प्रकरणांत पणजी पुलिसांनी धनराज परमार 45), ताची घरकान्न शितल परमार (46), सासू शमा बहीसादे (60) आनी विद्या साळुंकी (56) ह्या चौगांक अटक करून आंतरराज्य टोळयेक अटक केल्या.
ह्या प्रकरणांत प्रदीप भट हांणी कागाळ दाखल केल्ली. ते प्रमाण 12 डिसेंबर 2022 दिसा दोन बायलो आनी एक जोडपे सांजवेळार 6 ते 6.15 वरां मजगतीं, ज्वेलरी शोरूमांत अायले. ते उपरांत ते टोळयेन भांगरा खरेदी करपाच्या निमतान कर्मचाऱ्यांची नदर चुकोवन 2,37,309 रुपया मोलाचें 40.23 ग्रॅम भांगरा सरपळी अानी 2,16,350 मोलाचें एक मंगळसूत्र मेळून 4.53 लाखांच्यो भांगरा वस्ती फारावन पसार जाल्ल्याचे कागाळेंत नमूद केलां. हाची दखल घेवन पणजी पुलीस निरिक्षक निखील पालयेंकार हांच्या मार्गदर्शना खाला महिला पुलीस उपनिरिक्षक लॉरीन सिक्वेरा हांणी दोन बायलो आनी एका जोडप्या विरोधांत भादंसं कलम 380 आनी अारडब्ल्यू 34 खाला गुन्यांव दाखल करून चवकशी सुरू केली.
ह्या प्रकरणांत पुलिसांनी शोरूमांतल्या सीसीटिव्ही कॅमेराची चित्रफीत तपासणी सुरू केली. तातूंत दुबावितांची म्हायती मेळ्ळी. तशेंच दुबावितांचो मोबायल क्रमांकाची म्हायती मेळिल्ल्यान पुलिसांनी ताचेर लक्ष केंद्रीत केलें. मजगतीं अशा प्रकाराच्यो चोरयो हेर राज्यांत जाल्ल्याची म्हायती पुलिसांक मेळ्ळी. तशेंच हातूंत आंतरराज्य टोळयेचो आस्पाव अाशिल्ल्याची म्हायती पुलिसांक मेळ्ळी. ते प्रमाण उत्तर गोंय पुलीस अधिक्षक निधीन वाल्सन आनी उपअधिक्षक सुदेश नायक हांच्या मार्गदर्शना खाला पुलीस निरिक्षक निखील पालयेंकार हांच्या फुडारपणा खाला पुलीस उपनिरिक्षक मयूर पणशीकार आनी पंगडांनी चवकशी सुरू केली.
पुलीस पंगडान दुबावीत धनराज परमार, शितल परमार, शमा बहिसादे आनी विद्या साळुंकी ह्या चौगांक यशवंतपुरा जंक्शन बंगळुरूंत ताब्यांत घेवन गोंयांत हाडले. उपरांत तांची खोलायेन चवकशी केली, तेन्ना तांणी चोरी केल्ल्याचे मान्य केले. तशेंच वितळिल्ल्यो भांगरा वस्ती पुण्यांत दवरिल्ल्याची म्हायती दिली. पुलिसांनी 40.27 ग्रॅम भांगर जप्त केलां.