भांगरभूंय | प्रतिनिधी
एका हिंदू बरोवप्यान क्रिस्ती परबेचेर सुंदर काणी बरोवप हाचे परस भावपणाचें नातें कशें वर्णन करूंक जायत? आनीक एक खाशेलेपण म्हणल्यार…
एक बरें नेमाळें स्पश्ट लक्ष, आकर्शक रचना आनी सातत्यपूर्ण दर्जो तशेंच बरें संशोधन केल्ली सामुग्री दिता, आनी तें नेमाळें जेन्ना खास अवसराचेर छापून येता तेन्ना त्या विशयाक धरून खबरो, छंद वा जिणे पद्दती सारकिल्या विविध गजालींतल्यान म्हायतीची पुरवण करता. ताचो हेतू एकूच, जे खातीर हें नेमाळें छापलां ताचो उद्देश साध्य जावंचो. देखून बरे लेखक विंचून काडप, पानांची सोबीत मांडावळ करप आनी वाचक दुखचो ना हाची काळजी घेवन बरपां सादर करप ही मोख आसता. हेच धरतेचेर भांगरभूंय दिसाळ्यान नातालांची भरघोस म्हायती दिवपी नाताल अंक 2025 काडून इतिहासीक पावल मारलें. ते खातीर तांकां शाबासकी.
फाटभूंय
फाटल्या वर्सा दिवाळी अंक हाडूंक भांगरभूंयच्या ऑफिसांत गेल्ले कडेन संपादक महेशबाबांची भेट जाली आनी आमी तांकां सहज म्हणलें, ह्या वर्सा नाताल अंक काडूंक जाता जाल्यार पळयात म्हण. वेवस्थापना कडेन उलोवन कळयतां म्हण ताणीं सांगलें. पळेत जाल्यार थोड्याच दिसां भितर फोन आयलो नाताल अंक काडुंया म्हण. रोखडोच आमच्या वळखीच्या कांय बरोवप्यां कडेन संपर्क केलो आनी ताणीं बरपां धाडून दिलीं. ती रोमी लिपींत आशिल्लीं, देखून इल्ले कश्ट घेवन लिप्यांतर केलीं. हे विशीं दुसरो हेतू आशिल्लो, रोमी लिपींतल्या बरोवप्यांक उजवाडांत हाडचो. आमची मोख साध्य जाली. कोंकणी बरपांचीं लिप्यांतरां जालीं जाल्यार एक नवो पूल निर्माण जातलो हाची वेगळे तरेची बुनयाद भांगरभूंयन घाल्या. ते खातीर संपादक महेशबाब दिवेकार आनी तांच्या वेवस्थापनाक आमचे दिनवास. तेच बराबर हो नाताल अंक उजवाडा येवंक जायराती दिवपी आनी हाडप्यांचीय तुस्त करप योग्य थारतलें.
अंकाचो गाभो
ह्या अंकांत सुमार पंदरा बरपां आसात आनी कांय कविता. अंकांतलो मुखेल लेख ‘नातालांचो त्रिवेणी आविश्कार’ डॉ. पांडुरंग फळदेसाय हाणें बरयला. दोतोर ह्या लेखांत म्हणटा, “सगळ्या धर्मांक मान दिवपी भारता सारक्या देसांत क्रिस्तांव भाव हे नातालांचे परबेची वाट पळेतात.” हो विचार ह्या अंकाक अर्थ हाडटा. ह्याच अभ्यासपुर्ण लेखांत दोतोर नातालांचो हावेस आनी सुमार चवथ्या शेंकड्या आदीं हो उत्सव कसो जातालो आनी मागीर ताची प्रथा कशी बदल्ली हाचे विशीं खोलायेन म्हायती दिता. हे परबेक उजवाडाची परब कित्याक म्हणटात? भेटवस्तू वांटपाची चाल, नातालांचें झाड, सांता क्लॉजाची बारीकसाणीन म्हायती, कॅरल प्रथा, गिफ्ट कार्डां आनी निमाणे कडेन नातालां समयार गोंयच्या पारंपरीक जेवणाची खबर सांगता. ही उत्कृश्ट म्हायती सोंपयतना दोतोर म्हणटा, “ह्या उत्सवांत एक फावट ज्युदेव पुराय मनीस समाजाक सवस्तकाय मेळची ह्या हेतान ‘शालोम’ अशें म्हणटा. शालोम म्हणल्यार सासणाची भलायकी. ही भलायकी कुटुंबाच्या मोगान, भोंवतणच्या गिरेस्त पिकावळीक लागून, भलायकेची शांती आनी मनीससेवेचे भावनेंतल्यान मेळटा. तीच खरी घराब्याची समृद्धी. जिणेंत जें उज्वल आनी शुभ आसा तें सगळ्यांक मेळूं, हीच भावना ‘शालोमा’ फाटली. तीच भावना सगळ्यांच्या जिविताक मार्गदर्शक जावं, ही म्हजी प्रार्थना.”
ह्या अंकांत पांच कथा आसात त्यो नातालांच्या विशयाक धरून आसात. विन्सी क्वाद्रूसाची ‘क्रिस्मस फादर’, डॉ. आन्सेल्मो सुभाश फेर्नांडीसाची ‘सरप्रायज’, विज्ञानदूत श्रीकांत शंभू नागवेंकाराची ‘पिंकी आनी सांताक्लॉजाची घसर-गाडी’, मिनीन आल्मेदाची ‘सावयोचीं नातालां’, संध्या फेर्नांडीसाचे संकल्पनेचेर आदारीत ‘रांदच्यांचो दीस’. नातालांचो विशय कितले सुंदर तरेन कथांनीं मांडूंक जाता हाची ही गवायकी आसा.
फादर एवजेबियो गोमीस हाचो ‘नातालां सोंतोसाची, शांतीची आनी भेटो वांटपाची परब’ हो लेख नातालांचेर अदीक उजवाड घालता आनी धर्मीक नदरेन दर एका वाचप्याक शिक्षीत करपाचो उद्देश बाळगिता. लिनो बाप्तिस्ता दोवरादो हाच्या ‘एक याद, आवयच्या हातांतल्या कुन्सवाराची’ लेखांत नातालांच्या खाणा विशीं म्हायती मेळटा जाल्यार डेनियल एफ दे सौजाच्या ‘नातालांक काकुळट आनी दयामाया सगळ्यांक वांट’, पियो एस्तिवीसाच्या ‘नातालां: आदीं आनी आतां आनी पावरफूल संदेश दिवपी ‘नातालांची समारंभणी’ हो जॉन एम. आल्फोंसो हे लेख अंकाक सोबाय हाडटात. तांच्याच विचारांक जोडणी करपी ज्ञानदीप पोतेकाराचो ‘देवाचो पूत’ आनी नातालांतल्यान घेतिल्ल्या धड्याची म्हायती दिवपी बेळगांवच्या डॉ निखील दीक्षित हांच्या बरपांची मेजवानीच आसा. ह्या साहित्यान अंक भोव प्रतिभेन श्रुंगारला.
हे शिवाय आरमांदो फेर्नांडीस, सिस्टर आयडा रॉड्रिगीस, एनी दे कोलवाळे आनी मारियानो लुकास दिनीज हांच्या नातालांच्या कवितांनी अंकाक आनीक सुरोपाय हाडल्या. हो अंक दाटायेन ल्हान पूण रंगीत आनी ओडलायणो जाला. कोंकणी वाचप्यांक नातालांचे म्हायती विशीं तो समृद्ध केले बगर रावचो ना.
खाशेलेपण
ह्या अंकांत क्रिस्तांव आनी हिंदू बरोवप्यांचीं बरपां आसात. क्रिस्तांव बरोवपी नातालां विशीं बरे विचार मांडूंक शकतात, पूण तांचे परस बरे विचार हिंदू बरोवपी मांडूंक शकतात हें ह्या अंकान सिद्ध केलां. एका हिंदू बरोवप्यान क्रिस्ती परबेचेर सुंदर काणी बरोवप हाचे परस भावपणाचें नातें कशें वर्णन करूंक जायत? आनीक एक खाशेलेपण म्हणल्यार, रिकाम्या जाग्यांत नातालां विशीं ल्हान-व्हड विचार आनी चित्रां सयत सुरबूस म्हायती दिल्या, देखीक – काना गांवांत लग्नाच्या वसऱ्यांत जेजून केल्ली पयली मिलाग्र, मदर मारिया वापरताली ती बांय, नाताल झाड, फिलिपी वाठारांतले दोंगर, जिंगल बॅल्स, मोटवे रितीन जेजू क्रिस्ताची जीण, नाझारेथ – जेजुचो गांव आनी अंकाची एकुणूच रंगीत मांडावळ खुबूच आकर्शीत जाल्या.
संपादकाचो संदेश
नाताल अंकाचो संपादक महेशबाब दिवेकार ‘मनीसपण जागोवपी उत्सव’ ह्या माथाळ्याच्या संपादकियांत असो संदेश दिता, “ह्या नातलांक फकत सजावट, नखेत्रां, भेटवस्तूंत आडकून रावनासतना, मनांत उजवाडाची चूड पेटोवंया, सत्य, करुणेचो स्विकार करूंया. नातलांचो होच खरो अर्थ. आमची माती, मनीस, मुल्यां जपतना निसुवार्थी समाज घडोवपाचो नव्या वर्सा आदींच संकल्प सोडूया… सगल्यांक नातलां आनी येवपी नवे वर्स खोशेचें वचूं. आमेन.” हो संदेश एकवटाची भावना जागोवपी आसा.
सोंपयतना…
भांगरभूंय दिसाळ्यान नाताल अंक 2025 छापून क्रिस्तांव बरोवप्यां मदें नवे मोगाचे वाटेचो एक संस्कृतीक पूल बांदला. तो अदीक घट जावंचो आनी क्रिस्ती बरोवप्यांनी देवनागरींतूय बरोवंक लागचे हो आमचो हावेस. कोंकणी भास कसलेंच बंधन नासतना समृद्ध जावंची हो आवंडो. ह्या नाताल अंकान मारिल्ल्या इतिहासीक पावला वरवीं क्रिस्तांव समाजा मदें भांगरभूंयचो मोग वाडूं आनी चडांत चड लोकान तो वाचूंक घेवं, हीच प्रार्थना.
विन्सी क्वाद्रुश
9822587498
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
