भांगरभूंय | प्रतिनिधी
गोंयची इंटरनॅशनल मास्टर भक्ती कुलकर्णी हिका 2022चो अर्जुन पुरस्कार जाहीर जालो. अर्जुन पुरस्कारा खातीर वट्ट 25 खेळगड्यांची निवड जाल्या. पुरस्कार भेटवण सुवाळो 30 नोव्हेंबराक राष्ट्रपती द्रौपदी मुर्मू हांचे हस्तुकीं राष्ट्रपती भवनांत जातलो.
निवृत्त न्यायमुर्ती ए एम खानवीलकर हांच्या अध्यक्षपणाखाला निवड समितीन अर्जुन पुरस्कारा खातीर भक्ती कुलकर्णीची शिफारस केल्ली. खेळां मंत्रालयान निवड समितीची शिफारस स्विकारली. ताका लागून तिका अर्जुन पुरस्कार निश्चीत जालो. हो पुरस्कार मेळोवपी भक्ती कुलकर्णी गोंयची पयली बायल खेळगडी थारली जाल्यार वट्ट तिसरी गोंयकार थारली. तिचे पयलीं म्हणल्यार पद्मश्री ब्रह्मानंद शंखवाळकाराक 1997त जाल्यार फॉरवर्ड खेळगडो ब्रुनो कुतिन्हो (2001) ह्या गोंयच्या फुटबॉलर खेळगड्यांक हो प्रतिश्ठीत पुरस्कार फावो जाल्लो.
वर्साचे सुरवातीक चेन्नय ऑलिम्पियाड बुद्दीबळ सर्त जाल्ली. त्या वेळार भारताच्या पंगडान कांश्या पदक जिखिल्लें. त्या पंगडांत भक्तीचो आस्पाव आशिल्लो.
2018त रशियेंत जाल्ले बायलांचे संवसारीक करंड सर्तींत, 2019त चीनांत जाल्ले कॉण्टिनॅण्टल चॅम्पियनशिपींत, 2019त कझाकिस्तानांत जाल्ले फिडे बायलांचे संवसारीक चॅम्पियनशिपींत, राष्ट्रकूल खेळां सर्तींत तिणें तिसरी सुवात मेळयिल्ली.
2019त दिल्ली आनी 2016त उझबेकिस्तांत जाल्ले आशियायी वस्तादपण सर्तींतल्या जैतान तिका पुरस्कार पुरस्कार मेळोवन दिवपाक म्हत्वाची भुमिका वठयली.
भक्तीन सप्टेंबर 2021तले ऑनलायन ऑलिम्पियाडांत कांश्या पदक जिखिल्लें, जाल्यार 2021त स्पेनांत जाल्ले बायलांचे संवसारीक सांघीक वस्तादपण सर्तींत भारतान रुप्या पदक जिखिल्लें. भक्ती त्या पंगडाचें वांगडी आशिल्लें. 2018 आनी 2019तली बायलांची राष्ट्रीय सर्त लेगीत भक्तीन जिखल्या.
फाटल्या दोन वर्सां सावन भक्ती कुलकर्णीन ह्या पुरस्कारा खातीर अर्ज केल्लो. पूण, त्या वेळार तिचो विचार जावंक नाशिल्लो. फाटल्या णव वर्सां सावन बुद्दीबळ खेळगड्यांक अर्जुन पुरस्कार मेळूंक नाशिल्लो. अंदूं ऑलिम्पियाड पदकान देशांत मोठो प्रभाव घाला.
अंदूंचे अर्जुन पुरस्कार जैतिवंत
भक्ती कुलकर्णी (बुद्दीबळ), सीमा पुनिया (अॅथलेटिक्स), एल्डोस पॉल (अॅथलेटिक्स), अविनाश साबळे (अॅथलेटिक्स), लक्ष्य सेन (बॅडमिंटन), एच एस प्रणॉय (बॅडमिंटन), अमीत (बॉक्सींग), निखत जरीन (बॉक्सींग), आर प्रज्ञानंद (बुद्दीबळ), दीप ग्रेस एक्का (हॉकी), सुशीला देवी (ज्युडो), साक्षी कुमारी (कबड्डी), नयन मोनी सैकिया (लॉन बॉल), सागर ओवलकर (मल्लखांब), इलावेनील वलारिवन (नेमबाजी), ओमप्रकाश मिथरवाल (नेमबाजी), श्रीजा अकुला (टेबल टॅनीस), विकास ठाकूर (वेटलिफ्टींग), अंशू (कुस्ती), परवीन (वुशू), मानसी जोशी (पॅरा बॅडमिंटन), तरुण ढिल्लन (पॅरा बॅडमिंटन), स्वप्नील पाटील (पॅरा स्विमींग) आनी जेरलीन जे (आयकूंक येना, बॅडमिंटन)
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
