भांगरभूंय | प्रतिनिधी
पणजी ः राज्याचे लोकसंख्येंत सगल्यां व्हडलो आशिल्ल्या भंडारी समाजा भितरल्या दोन गटां मदलो वाद ल्हवू ल्हवू मुखार येवपाक लागला. समाजाचे एक फुडारी उपेंद्र गांवकार हांणी शुक्रारा पणजे पत्रकार परिशद घेवन सद्याचे समितीचेर आरोप केले उपरांत आतां समाजाचे अध्यक्ष अशोक नायक हांणीय सोशल मिडिया वरवीं गांवकार हांच्या आरोपांक जाप दिवन तांचेर टिका केल्या.
अशोक नायक हांचे सयत समाजाची समिती बेकायदेशीर आसा. देखून हे भौशीक बसकेक हाजीर रावचें न्हय अशें आवाहन उपेंद्र गावकार हांणी पत्रकार परिशदेंत केलें. नेमा प्रमाण ही समिती 2018 ते 2021 अशीं तीन वर्सा मेरेन आशिल्ली. नोव्हेंबर 2021 वर्सा हे समितीचो काळ सोंपलो. पूण ऑगस्ट 2021 वर्सा कोविडाक लागून ऑनलायन बसका घेवन तिची मुजत वाडयली. फकत 7 ते 8 जाणांक हे ऑनलायन बसकेची लिंक दिल्ली. संघटनेच्या संविधाना प्रमाण बसका ऑनलायन जावंक शकना. सध्याचे समितीन जायत्या नेमाचें उल्लंघन केलां अशेंय गांवकार हांणी सांगलें. म्हणल्यार सद्याचे समितीन अधिकार नासतना लेगीत सचीव आनी सरचिटणीस पदांची नेमणूक केल्या. हे नेमणुकेक सार्वत्रिक सभेन मान्यताय दिवची. पूण तशें जावंक ना. पणजी पुलिशेंत समितीच्या पदाधिकाऱ्यां आड भानगड केल्ल्याची कागाळ नोंद जाल्या. फुडले 15 दिसांत आरोपपत्र दाखल करतले अशें सुदेश किनळेकारान सांगिल्लें.
2018 वर्सा आमी ज्या लोकांक हारयले तेच लोक आतां सुवार्थी कारणांक लागून आमचेर आरोप करतात. आमचें जैत आसून लेगीत हे लोक न्यायालयांत गेले. थंय समाजान गरजे भायर लाखांनी रुपया खर्च केले. ताचे समितीन जायत्या जाणांक बोगस समाजाची प्रमाणपत्रां वांटली. तातूंतले कांय जाण आयज सरकारी सेवेंत काम करतात. एकलो सरपंच जाला. 2018 वर्सा तांच्या समितीन 683 वांगड्यांक मतदान करपाचो अधिकार दिल्लो. पूण, तांचे कडल्यान वांगडीपण शुल्क घेवंक नाशिल्लें. हे संबंदी आपूण न्यायालयांत वतलों अशीय शिटकावणी अशोक नायक हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
