भांगरभूंय | प्रतिनिधी
आयतारा आमसभा, काय जाणांचो आमसभेक विरोध
पणजी, प्रतिनिधी : गोंय भंडारी समाजाची आमसभा आयतारा १० सप्टेंबराक सकाळीं १० वराचेर भंडारी भवनाच्या पाजीफोंड- मडगांवच्या कार्यालयांत जातली. समाजाच्या घटना दुरूस्तीचो मसुदो तयार आसा. आमसभेंत घटना दुरूस्तीक मान्यताय मेळटली. कांय जाणांचो आमसभा घेवपाक विरोध आसा. हाका लागून आमसभे विशीं वाद निर्माण जाला.
ज्या वांगड्यांक आमसभेंत सुचवण्यो करपाच्यो आसात, तांणी लेखी स्वरूपांत त्यो ५ सप्टेंबराक सांजेच्या ५ वरां मेरेन सादर करच्यो. ह्यो सुचोवण्यो केंद्रीय समिती कार्यालय, वृंदावन चेंबर्स, पाटो – पणजी हांगां सादर करच्यो, अशें समाजाचे अध्यक्ष अशोक नायक हांणी कळयलां. ते विशीं हाचे आदीं कळयिल्लें.
फाटल्या वर्साच्या इतिवृत्ताक मान्यताय दिवप, लेखा परीक्षण अहवालाक मान्यताय दिवप हे विशय अजेंड्याचेर आसा. तशेंच हेर लेखी विशयांचेर अध्यक्षांच्या मान्यतायेन चर्चा जावप शक्य आसा, अशें अध्यक्ष अशोक नायक हांणी म्हणलें.
प्रशासक नेमचो : आतीश मांद्रेंकार
भंडारी समाजाची सध्याची समिती बेकायदेशीर आसा. आमसभा घेवपाचो अधिकार समितीक ना. सरकारान हस्तक्षेप करून समिती बरखास्त करची आनी प्रशासक नेमचो. प्रशासका खाला वेंचणूक घेवची, अशी मागणी आतीश मांद्रेकार हांणी केल्या. घटने प्रमाण आमसभा मे म्हयन्याच्या दुसर्या सप्तकांत जावपाची आसता. सप्टेंबरात ती कित्याक? असो प्रस्न तांणी केला.
घटने प्रमाण आमसभा : अशोक नायक
समाजाचे घटने प्रमाण वर्सांतल्यान एकदां आमसभा जावपाक जाय. आमसभा आयतारा जातली. सध्याची समिती वेंचून आयल्या. दर खेपो कांय लोकांचो आमसभेक आक्षेप आसता. नेमा प्रमाण आमसभा जातली. घटना दुरूस्तीचो मसुदो तयार आसा. आमसभेत घटना दुरूस्तीक मान्यताय घेतले, अशें अध्यक्ष अशोक नायक हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
