भांगरभूंय | प्रतिनिधी
टॅक्सी वेवसायीकः येरादारी अधिकाऱ्यांक घेराव, आमदारा सयत घेराव घालपाची शिटकावणी
भांगरभूंय । प्रतिनिधी
पेडणें: मोपा विमानतळ वाठारांत पेडणें म्हालांतल्या टॅक्सी वेवसायिकांक रोखड्या रोखडो ब्ल्यू टॅक्सी स्टॅण्ड दिलो ना जाल्यार वेळ पडल्यार थळावे आमदार प्रवीण आर्लेकार आनी मुख्यमंत्री डॉ. प्रमोद सावंत हांकांय घेराव घावपाची शिटकावणी मोपा ग्रीनफिल्ड टॅक्सी वेवसायीक संघटणा आनी हेर टॅक्सी वेवसायिकांनी दिल्या. 18 जानेवारीक पेडणें येरादारी अधिकाऱ्याक घेराव घातले उपरांत तांणी ही शिटकावणी दिली.
मुख्यमंत्री डॉ. सावंत हांणी टॅक्सी वेवसायिकांक लेखी स्वरुपांत ब्ल्यू टॅक्सी स्टॅण्ड दिवपाचें उतर दिल्लें, तें अजून मेरेन पुराय जावंक ना. हे खातीर टॅक्सी वेवसायिकांनी पेडणें येरादारी खात्याच्या अधिकाऱ्यांक घेराव घालून हे संबंदांत जाब विचारलो. ह्या वेळार पेडणें भोवजन समाजाचे फुडारी उमेश तळवणेंकार, टॅक्सी वेवसायीक संघटणेचे उदय महाले, अॅड. जितेंद्र गांवकार, रमाकांत तुळसकार आनी हेर टॅक्सी वेवसायीक हाजीर आशिल्ले.
इत्सूक आशिल्ल्या टॅक्सी वेवसायिकांची पुराय म्हायती एका अर्जा वरवीं भरून कार्यालयांत दिवची, अशें आपल्याक वरिश्ठ अधिकाऱ्यांनी सांगलां. ते प्रमाण ज्या कांय टॅक्सी वेवसायिकांनी अर्ज आपले कडेन दिल्यात ते आपणे वरिश्ठ अधिकाऱ्यां मेरेन पावयल्यात. ते भायर टॅक्सी वेवसायांक ब्ल्यू टॅक्सी स्टॅण्ड मेळचो हे खातीर जें आंदोलन चलता वा जे तरेन निवेदनां दितात, ती लेगीत आपूण त्याच वेळार आपल्या वरिश्ठां मेरेन पावयता, अशें येरादारी अधिकाऱ्यान घेराव घातिल्ल्या टॅक्सी वेवसायिकांक सांगलें.
मोटर अॅक्ट कायद्या प्रमाण जीं कागदपत्रां आसात तींच टॅक्सी वेवसायिकांक दिवचीं, सरकाराची एजंटगिरी करची न्हय, अशें टॅक्सी वेवसायिकांनी तांकां सुचयलें.
अॅड. जितेंद्र गांवकार हांणी थळाव्या पत्रकारां कडेन उलयतना सांगलें, टॅक्सी वेवसायिकांचे सुरू आशिल्ले चळवळीक पेडणें म्हालांतल्यान व्हड प्रमाणांत तेंको मेळटा. सरकारान जें उतर दिलां तें पाळचें नाजाल्यार लोकशाय मार्गांतल्यान जीं जीं आंदोलनां करचीं पडटलीं, चळवळ उबारची पडटली, ताका आमी तयार आसात.
उमेश तळवणेंकार हांणी सांगलें, सरकारान ताकतिकेन ब्ल्यू टॅक्सी स्टॅण्ड उपलब्ध करून दिवचो, नाजाल्यार थळाव्या आमदारा सयत मुख्यमंत्र्यांकूय घेराव घालतले. हें आंदोलन खर स्वरुपाचें करचें पडटलें. आमी आमच्या न्याय हक्का खातीर झगडटात. मोपा विमानतळा खातीर आमच्यो जमनी गेल्यात. सरकारान ताचें नांवा पुरतें मोल फारीक केलां, जाल्यार कांय जाणांक अजून तेंवूय मेळूंक ना. आतां टॅक्सी वेवसाय भायल्या लोकांक दिवपाचो सरकार यत्न करता. जे तरेन मंत्री आनी खात्याचे अधिकारी वागतात ताका आमचो विरोध आसा, अशें क्रुमरकर हांणी सांगलें.
जिवाच्या आकांतान लडटलेः गजेंद्र गडेकार
टॅक्सी वेवसाय हो पेडणेंकारांचो हक्क म्हूण तांकां मेळपाक जाय. मात सरकार आनी संबंदीत मंत्री पेडणेंकारांची दिशाभूल करून हो वेवसाय आनीक कोणाक तरी दिवपाक सोदता. मात तांच्या ह्या फटाश्यांक पेडणेंकार बळी पडचे नात. वेळ आयल्यार खर आंदोलन उबारतले. कितेंय जालें तरी पेडणेंकार फाटीं सरचे नात. हो लढो आमी जिवाच्या आकांतान लडटले, अशी शिटकावणी गजेंद्र गडेकार हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
