भांगरभूंय | प्रतिनिधी
मोपा ब्ल्यू कॅप टॅक्सी वेवसायिकांची मागणी
पेडणें: सद्दां उठून आपलो टॅक्सी कावंटर बंद करून आमदार, मुख्यमंत्री वचपाक लायल्यार येवपी वेंचणुकेंत आमी तांची सुवात दाखयतले. फाटलीं दोन ते तीन वर्सां आमी ह्या विशयाचेर आमदारा कडेन वतात, जीएमआरा वांगडा बसका करतात. आजूनय कांयच जायना. ह्यान फुडें सरकार जर आमकां अशीच वागणूक दिता जाल्यार आमी वेंचणुकेंत कितें तें दाखोवन दितले अशी शिटकावणी टॅक्सी वेवसायिकांनी दिली.
मोपा विमानतळार ब्लू टॅक्सी कावंटर परत परत बंद करपाचो आदेश जीएमआर कंपनी दिल्ल्यान आयज टॅक्सी चालकांनी आपल्यो टॅक्सी पेडण्यां बाजारांत लावन, मामलेदार कार्यालयांत बसका आपयली. हे बसकेक आमदार प्रवीण आर्लेकार, उप जिल्लोअधिकारी, मामलेदार, येरादारी अधिकारी आनी टॅक्सी ड्रायवर हजर आशिल्ले. आमदार प्रवीण आर्लेकार हांणी हो प्रस्न आपूण सोडयतलों अशें सांगलें.
ह्या वेळार आदले पेडणें भाजप मंडळ अध्यक्ष तुळसीदास गांवस हांणी, आपलो थळावो आमदार योग्य तरेन हो प्रस्न सोडयना. हाका लागून हो प्रकार सेगीत घडतूच आसा. आपूण पेडणेंच्या लोकां वांगडा आसा. मुख्यमंत्र्यांनी बेगोबेग ह्या प्रस्नाचेर लक्ष घालून तो सोडोवपाची गरज तांणी उक्तायली.
आमदार प्रवीण आर्लेकार हांणी, ब्लू कॅप टॅक्सी वेवसायिकांच्यो समस्या आपणें लागींच्यान आयकल्यात. त्यो सगल्यो समस्या आयज बसकेंतूय मांडल्यात. आपूण स्वता मुख्यमंत्री डॉक्टर प्रमोद सावंत हांची भेट घेवन तांचे कडेन ह्यो सगल्यो समस्या मांडून, तांकां न्याय मेळोवन दिवपा खातीर आपूण यत्न करतलों अशें तांणी सांगलें.
मोपा विमानतळार ब्लू कॅप टॅक्सी ज्या तरणाट्याक मेळ्ळी, ताका एक रोजगार मेळ्ळो. जाचे कडेन ब्लू टॅक्सी कॅब आसा, ताका हेर वेवसाय, हेर धंदे, गाडी घेवपाक मेळना. म्हणून सरकारान ब्लू कॅप टॅक्सी म्हळ्यारूच एका बेरोजगाराक रोजगार उपलब्ध करून दिल्ल्याचो दावो हंसापूर सरपंच तुळशीदास गांवस हांणी केलो.
तुळशीदास गांवस हांणी मुखार उलयतना सांगलें, थळावे आमदार प्रवीण आर्लेकार हांणी टॅक्सी वेवसायिकांक आश्वासन दितना आपूण मुख्यमंत्री डॉक्टर प्रमोद सावंत हांचे कडेन चर्चा करून आपूण तांकां न्याय मेळोवन दितलोंच, असो विस्वास ह्या वेळार तुळशीदास गांवस हांणी उक्तायलो. तांणी तो न्याय मेळोवन दिवचो, अशी मागणी गांवस हांणी केली. पेडणेंकारांक न्याय मेळचो होच आमचो हेत. हांगा कसलेंच राजकारण ना असोय दावो तांणी केलो. टॅक्सी वेवसायीकांनी ह्या वेळार मागणी करतना, जर सरकारान आमकां परत कावंटर उपलब्ध करून दिवंक ना, जाल्यार ज्या विभागान आमकां परवाने दिल्यात ते परवाने आमी परत करतले. तशेंच वाहनांच्योय चावयो तांकां परत दितले, असो दावो टॅक्सी चालकांनी केलो. आमचो कावंटर सुरू करचो. तो केन्नाच बंद करचो न्हय म्हणून सरकारान आमकां न्याय दिवचो अशी नेटान मागणी टॅक्सी वेसायिकांनी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
