भांगरभूंय | प्रतिनिधी
भांगरभूंय । खेळां मेज
पणजीः पर्पल फेस्टांत आयोजीत केल्ले ब्लायंड क्रिकेट सर्तींत तेलंगणाच्या पंगडान वस्तादपण मेळयलें. आयतारा जाल्ले फायनलींत ताणी येजमान गोंय पंगडाक 152 धांवड्यांनी हारयले. पर्यटन मंत्री रोहन खवंटे हांणी तेलंगणाच्या कॅप्टनाक करंड भेटयलो. इनाम भेटवण कार्यावळीक समाज कल्याण मंत्री सुभाष फळदेसया हाजीर आशिल्ले.
हे क्रिकेट सर्तींत गोंय, महाराष्ट्र, छत्तीसगड, केरळ, पुदुचेरी आनी तेलंगणाच्या पंगडान वांटो घेतिल्लो. दरेकी 20 ओव्हरीच्यो मॅची पर्वरी हांगच्या जीसीए स्टेडियमाचेर जाल्यो. हे सर्तींत सामकेंच दिसना अशे चार लागींचें दिसता अशे तीन आनी 6 मीटरां मेरेनचें दिसता अशे चार खेळगडे वांटेकार जाल्ले.
फायनलींत तेलंगणाच्या पंगडान पयलीं खेळून आपल्या डावांत 312 धांवड्यो केल्यो. तेलंगणाच्या बॉलरांनी गोंयांक 160 धांवड्यांत बाद करून सर्तीचें वस्तादपण मेळयलें.
—————————————————–
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
