भांगरभूंय | प्रतिनिधी
परकी देशांतलो आपोवक नाशिल्लो एक फिरंगी सोयरो तुज्या रासवळ घरांत येवन रावलो. सुरवे- सुरवेक कपट बुद्धीन आनी मागीर काय काळा उपरांत आपणाल्या
बळाचा वापर करून हो पावणो खासा तुज्या घराचो धनी जावन रावलो!
धनी जाल्लो हो सोयरो ल्हव- ल्हव तुज्या घरातली संपत्त चोरुक लागलो आनी ती आपणाल्या देशांत पावती करुंक लागलो. पूण, मुखार परिस्थिती बदल्ली. आनी ह्या घुरी घालपी पावण्याक तुजे घर सोडून वच्चे पडलें.
लुबाडिल्ल्या दुडवां वरवीं आपणाल्या देशांत उबारील्या राजम्हालांत तो रावपाक गेलो. अशे तरेन जायती वरसां सरलीं. तुज्या ह्या आदल्या मालकान लुटिल्ल्या मदले खुबशे धन कशाय- कशे फरफरायलें. मजगतच्या काळात तुवें खूब हाल- उपाद्रे काडले, हाडांची काडां केली आनी तुजी व्हगडावल्ली गिरेस्तकाय तुंवें परतून उबी केली. वरसां वचूक लागलीं. करतां- करतां तुका नाडिल्ल्या त्या तुज्या सोयऱ्याच्या बँक बँलंसा परस तुजो बँक बँलंस चड- चड जायत रावलो! ह्या घडत आयिल्ल्या नव्या बदलाक लागून दुसऱ्यांक आपणाले दास करपी तुजो हो आदलो ‘पात्रांव’ चाळवलो. मागीर ताणें एक माण्णी केली. ताणें एक वावडी संवसारभर पातळायली की तो तुका जगपा खातीर म्हूण दर वर्सा दुडवांची पुरवण करीत आसता म्हूण.
ही वयली खबर म्हणल्यार ब्रिटीश साम्राज्याचे चढ आनी उतार हांची लजकाडी काणी. तेच परीं भारत आनी ब्रिटन (आदलें ब्रिटीश राज) हांच्या मदल्या सद्याच्या काळांतले संबंद.
आयकय (ICAI) नांवाची एक ब्रिटीश संघटणा खंय दावो करता की ब्रिटना कडल्यान भारताक मेळपी 28 कोटी पौंडाच्या आदाराक ‘चणे- भिकणां’ म्हणून ते मजतीची धजा उडयिल्ली. ताचे उपरांत रोखडेच ब्रिटनान भारताक मजद दिवप बंद केलें. मजगतच्या काळांत भारतान आपणाल्या अंतराळ कार्यावळींची तेच परी परमाणू क्षमतेची अजाप भरीत उदरगत सादली. इतलेंच न्हय आमचो देश हेर अनेक देशांक मदत करूक लागलो.
सद्याच्या परिस्थितीत आमच्या देसाची अर्थवेवस्था ब्रिटनच्या अर्थवेवस्थे परस मुखार पावल्या. तिचो नंबर आतां संवसारांत पांचवो लागला. अमेरिका, चीन, जपान आनी जर्मनी ह्या देशांत अर्थवेवस्था उपरांत भारत ही जगा वयली पांचवी व्हड अर्थवेवस्था जाल्या. देखून ब्रिटन आजुनूय भारताक आदार करता हो दावो भायर मारपा इतके अर्थहीण आनी हास्यास्पद आसा. ही मजत म्हळ्यार निखटी ‘चणे-भिकणां’ उरुंक ना. ही मजत म्हळ्यार एक सूरय फटास जाल्या.
आतां ब्रिटन जो ‘आपूण भारताक मजत करतां’, असो दावो करता. त्या दाव्याक आमी दुसरे नदरेन पळोव येता. ब्रिटीश राजवटीन भारताची जी पळय नागवण केल्या तिचें मोल ब्रिटनाची 2021 वर्साच्या जीडीपी (म्हळ्यार 2. 2 ट्रिलीयन पौंड) परस अदीक आसा. घडये हे रीण फारीक करपा खातीर त्या देशान इथम आय (समान म्हयन्याळो हप्तो) ही रीत आपणायल्या आसुये.
मूळ लेखक : जग सुरय्या
प्रदीप लवंदे
9923292022
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
