भांगरभूंय | प्रतिनिधी
फोंडें, प्रतिनिधी ः फाटल्या कांय दीसा सावन कुर्टी सयत बोरी आनी भोंवतणच्या वाठारांत भोंवपी बिबट्याक फोंडें रान खात्याच्या कर्मचाऱ्यांनी आयज सकाळीं धरलो. चार दिसां आदीं रानां खात्याच्या कर्मचाऱ्यांनी कुर्टी, बोरी आनी शांतीनगर हांगा सांपळे घाल्ले. तांतूतल्या बोरी घाल्ल्या सापळ्यांत बिबटो सांपडलो.
बोरी वाठारांतल्या शिरशिरे, दब, कुडयाळ आनी कलमामळ वाठारांनी फाटल्या कांय दिसां सावन रस्त्यांचेर बिबट्यो भोंवतना दिश्टी पडटा. बोणबाग आनी शांतीनगर वाठारांनीय बिबट्यांची हालचाल वाडिल्ली. रानां कर्मचारी हांगाचे परिस्थितीचेर नदर दवरुन आशिल्ले.
बिबट्याक धरपा खातीर शांतीनगर हांगा सापळो लायलो. सुमार धा दिसां आदीं कार्यालयांत बिबट्यां संबंदी 5 कागाळी आयल्यो. ते प्रमाण शांतीनगर, कुर्टी आनी बोरी वाठारांनी सांपळे घाले. बिबट्यांच्या हालचालीचेर नदर दवरपा खातीर निरंकाल वाठारांत रातच्या वेळार कर्मचारी राविल्ले.
निरंकाल, कुंभरवाडो, सातेरीमळ आनी माट्टीधाड वाठारांनीय फाटल्या कांय दिसां सावन बिबटो भोंवता. बेतोडाचे सरपंच मधु खांडेपारकार हांच्या घरा मुखार अचकीत बिबट्यान रस्त्यार उडी मारिल्ल्यान लोकां मदीं भंय निर्माण जाल्लो. सरपंचान फोंडें रानां खात्याचे अधिकारी दीपक तांडेलाक मेळून हे घडणुकेची म्हायती दिली. ते प्रमाण अधिकारी तांडेल हांणी वाठारांत गस्त घालपाचें उतर दिल्लें. निमाणें रानां खात्याचे हे यत्नांक आयज येस आयलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
