भांगरभूंय | प्रतिनिधी
भांगरभूंय । प्रतिनिधी
बोरयेः बोरयेच्या नवदुर्गा संस्थानाची कार्तिक पुनवेची जात्रा भाविकांनी व्हडा उमेदीन मनयली. आवळी जेवणान उत्सवाक सुरवात जाली आनी नौका विहारान तिचो समारोप जालो. वर्सुकी दिवजां मिरवणुकेत व्हडा संख्येन सुवासिनी वांटेकार जाल्लीं. गोंयांतल्या जात्रांक नवदुर्गा देवस्थानांतले कार्तिक पुनव जात्रेन सुरवात जाता आनी शिरगांवचे जात्रेन तांचो समारोप जाता.
जात्रेच्या वेळार संवसारीक रंगमाची दिसा निमतान नवदुर्गा रंगमाचयेर नाट्य महोत्सव जालो. साईराज बोरकार, नवदुर्गा संस्थान, बोरी सम्राट क्लब आनी गोंय सरकाराच्या कला आनी संस्कृती खात्या वतीन हो महोत्सव आयोजीत केल्लो. नाट्यकर्मी विजयकुमार नायक हांच्या नाटकाचें जात्रेंत सादरीकरण जालें. पयल्या दिसा अहिल्योद्धार, दुसऱ्या दिसा पालशेतची विहीर नाटकाचो प्रयोग जालो.
नवदुर्गा देवस्थानाचो अध्यक्ष शाम प्रभुदेसाय हांचे हस्तुकीं विजयकुमार नायक हांचो भोवमान केलो. लोक कलाकार प्रदीपच्यारी हाचो लेगीत भोवमान केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
