भांगरभूंय | प्रतिनिधी
नगराध्यक्षान केली पळोवणी; गणपती पावोवपाची समस्या सुटली
भांगरभूंय । प्रतिनिधी
दिवचलः व्हाळशी ते वाठादेव सर्वण मदल्या नव्या बायपास रस्त्या खाला बोड्डें दिवचले सुरू आशिल्लें उड्डाण पुलाचें काम पुराय जावपाक पावलां. चवथी वेळार लोकांक हो पूल तात्पुरतो उक्तो करून दितले. ताका लागून गोठण वाठारांतल्या लोकांक गणपती पावोवपाची समस्या पयस जातली. ह्या वावराची मंगळारा दिवचल पालिका आनी भौशीक बांदकाम खात्याचे कार्यकारी अभियंते हांणी वांगडा पळोवणी केली. ह्या कामाचेर सगळ्या नगरसेवकांनी समाधान उक्तायलां. थळावी नगरसेविका अॅड. रंजना वायंगणकार हांणी हे संबंदांत संबंदीत अधिकाऱ्यां कडेन नेमान फाटपुरवण केल्ली.
ह्या संबंदांत आमदार डॉ. चंद्रकांत शेट्ये हांणी लेगीत फाटपुरवण करतना लोकांची गैरसोय जावची ना हाची जतनाय घेवपाचे आदेश दिल्ले. ते प्रमाण चवथी आदीं लोकांक हो पूल उक्तो करून दिवपा खातीर यत्न चलयल्यात.
व्हाळशी ते वाठादेव सर्वण हे मदीं जावपी ह्या बायपास रस्त्या खातीर बोड्डेंचे मसुंडी लागसार आनी पिराची कोंड अशे दोन उड्डाण पूल बांदतले. बोड्डें उड्डाण पुलाचें काम स म्हयन्यां आदीं सुरू केल्लें. ताका लागून येरादारी खातीर पर्यायी रस्त्याची वेवस्था केल्ली. चवथी आदीं हो पूल बांदून पिराय जातलो, अशें त्या वेळार सांगिल्लें.
हो पूल चवथी आदीं उक्तो जावप गरजेचें आशिल्लें. कारण ह्याच मार्गा वयल्यान देड ते दोन हजार गणपती गोठण न्हंयेचेर पावोवपा खातीर व्हरतात. सध्या हो पूल तात्पुरत्या वापरा खातीर उक्तो करतले, पूण चवथी उपरांत परतून तो बंद करून उरिल्लें काम पुराय करतले, अशें भौशीक बांदकाम खात्याचे कार्यकारी अभियंते आत्माराम गावडे हांणी सांगलें. ह्या वेळार नगराध्यक्ष कुंदन फळारी, थळावी नगरसेविका अॅड. रंजना वायंगणकार, दीपा पळ, निलेश टोपले, सुदन गोवेकार, संगम पळ, समीर वायंगणकार आनी हेर मानेस्त हाजीर आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
