बोडगेश्वर समितीचो सोपूत सुवाळो स्थगीत

भांगरभूंय | प्रतिनिधी

वेंचणूक निकालूय स्थगीत दवरपाचो प्रशासकीय लवादाचो निर्णय

भांगरभूंय । प्रतिनिधी

म्हापशें : म्हापशेंच्या श्रीदेव बोडगेश्वर देवस्थान समितीचो वेंचणूक निकाल आनी शुक्रारा 14 फेब्रुवारीक जावपा आशिल्ल्या नव्या पदाधिकाऱ्यांचो सोपूत सुवाळो प्रशासकीय लवादान स्थगीत दवरला. ह्या प्रकरणाची फुडली सुनावणी सवादा कडेन 18 फेब्रुवारीक जातली.

ह्या प्रकरणांत देवस्थानाचे अध्यक्ष आनंद भाईडकार हांणी गोंयांतल्या मुंबय उच्च न्यायालयाच्या निर्देशा प्रमाण, प्रशासकीय लवादा कडेन आव्हान याचिका दाखल केल्या. ते प्रमाण आयतारा 9 फेब्रुवारीक श्रीदेव बोडगेश्वर देवस्थानाचे वेवस्थापन समितीची वेंचणूक घेतिल्ली. हे वेंचणुके आदीं म्हणल्यार शुक्रारा 7 फेब्रुवारीक सांजे वेळार देवस्थान प्रशासक तशेंच देवस्थानाच्या सचिवांनी नव्या 252 म्हाजनांची नोंद करून वट्ट 1,416 जाणांची वळेरी मतदाना खातीर ग्राह्य धरली. त्या नव्या 254 म्हाजनांक मतदानांत आस्पावीत करपाक मेकळीक दिवपाचो आदेश जारी केल्लो. ते उपरांत हेच वळेरी प्रमाण बार्देस देवस्थान प्रशासकान वेंचणूक घेतली.

बार्देस देवस्थान प्रशासक आदेशाक अध्यक्ष आनंद भाईडकार हांणी गोंयांतल्या मुंबय उच्च न्यायालयांत धांव घेतिल्ली. तातूंत गोंय सरकार, गोंयचे मुख्य सचीव, बार्देस मामलेदार आनी बोडगेश्वर देवस्थानाचे नव्यान वेंचून आयिल्ले पदाधिकारी आशिल्ले अ‍ॅड. वामन पंडीत, उपाध्यक्ष अमेय कोरगांवकार, सचीव हरिश्चंद्र उर्फ सुशांत गांवकार, सहसचीव कुणाल धारगळकार, भांडारी श्यामसुंदर पेडणेंकार, उपभांडारी विशांत केणी, मुखत्यार राजेंद्र पेडणेंकार आनी उपमुखत्यार साईनाथ राऊळ हांकां प्रतिवादी केल्ले.

मजगतीं, वेंचणुकेचे फाटभुंयेर 20 जानेवारीक देवस्थानाच्या कार्यकारी मंडळा वतीन समिती सचिवान देवस्थान प्रशासक आशिल्ले बार्देसचे मामलेदार अनंत मळीक हांचे कडेन म्हाजन वळेरी सादर केल्ली. तातूंत 254 नव्या म्हाजनांचो आस्पाव केल्लो. ते प्रमाण 1,416 जाणांची ही वळेरी आशिल्ली. तशेंच ती वळेरी अध्यक्षांचे मान्यताये बगर प्रशासकाक सादर केल्ली. हो प्रकार कळ्ळे उपरांत ह्या अतिरिक्त नव्या म्हाजनांच्या नांवांक कांय म्हाजनांनी हरकत घेवन तीं नांवां वेंचणूक प्रक्रियेंतल्यान वगळपाची मागणी केल्ली. ते परांत प्रशासकांचे सुचोवणे वयल्यान देवस्थान अध्यक्षान 1,162 म्हाजनांची वळेरी सादर केल्ली. तरी लेगीत प्रशासकान देवस्थान सचिवान सादर केल्ल्या 1,416 जाणांच्या म्हाजन वळेरेक मान्यताय दिवन वेंचणूक घेतली. तशेंच आनी ह्याच नव्या 254 म्हाजनांचे मजतीन एप्रील 2025 ते मार्च 2028 ह्या तीन वर्सांच्या काळाची समिती निवडून आयिल्ल्याचो दावो हे याचिकेंत केल्लो.

तशेंच वयली वळेरी मंजूर करचे कातीर देवस्थान समितीची बसकाच जावंक नाशिल्ली. तशेंच म्हाजन वांगडीपद नुतनीकरणाच्या निमाण्या दोन दिसा 30 आनी 31 डिसेंबराकूय नव्या म्हाजनांच्या नांवांचो देवस्थानान म्हाजन वळेरेचो आस्पाव केल्लो. मात ते खातीर म्हाजन वांगडीपद नुतनीकरणा खातीर लागू केल्लें वळखपत्र वा रगताच्या नात्यांतल्या वांगड्यांचें वळखपत्र सादर करपाची अट नव्या म्हाजनांक लागू करूंक नाशिल्ली, असोय दावो याचिकेंत केल्लो.

हे संबंदांत उच्च न्यायालयांत बिरेस्त्रा सुनावणी जाली तेन्ना भाईडकार हांचे वतीन अ‍ॅड. चैतन्य पाडगांवकार हांणी वयले मुद्दे न्यायालयांत मांडले. ह्या प्रकरणांत न्यायालयान दोनूय बाजू आयकून घेतले उपरांत संबंदीत प्रकरण प्रशासकीय लवादा कडेन दाद मागपाची मेकळीक याचिकादाराक दिली. ते प्रमाण याचिका फाटीं घेवन दनपारां प्रशासकीय लवादा कडेन याचिका दाखल केली. ह्या प्रकरणांत याचिकादारा वतीन अ‍ॅड. चैतन्य पाडगांवकार हांणी वयल्या मुद्द्यां सयत 14 फेब्रुवारीक नव्यान वेंचून आयिल्ल्या पदाधिकाऱ्यांचो सोपूत सुवाळो जावपाचो आसा, अशी म्हायती लवादाक दिली. हाची दखल घेवन तशेंच कायदो आनी सुवेवस्थेचो प्रस्न निर्माण जावपाची शक्यताय उक्तावन लवादान श्रीदेव बोडगेश्वर देवस्थानाच्या वेवस्थापन समितीचो वेंचणूक निकाल आनी शुक्रारा 14 फेब्रुवारीक जावपा आशिल्लो सोपूत सुवाळो स्थगीत दवरलो.