भांगरभूंय | प्रतिनिधी
उच्च न्यायालयांत याचिका हाडली निकालांत
म्हापशें ः बोडगेश्वर देवस्थानाचे वेंचणुके खातीर नव्या म्हाजनांक मतदानाचो अधिकार दिवपाच्या देवालय प्रशासकांच्या निर्णया विशीं लवादा कडेन वचपाचो निर्देश जारी करून उच्च न्यायालयान देवस्थानाचे अध्यक्ष आनंद भाईडकार हांची याचिका निकालात काडली. आयज सकाळीं उच्च न्यायालयांत हे याचिकेचेर सुनावणी जाली तेन्ना हो आदेश न्यायालयान दिलो. उपरांत याचिकादार भाईडकार हांणी आपली याचिका फाटीं घेतली.
मजगतीं, ९ तारखेर देव बोडगेश्वर देवस्थानाची वेंचणूक जाल्ली. हे वेंचणुके वेळार शुक्रार ७ तारखेर सांजेवेळार देवालय प्रशासकांनी, सचिवांनी, नव्या २५४ म्हाजनां सयत वट्ट १४१६ जाणांची वळेरी मतदाना खातीर ग्राह्य धरली. त्या नव्या २५४ म्हाजनांक मतदानांत वांटो घेवपाक मेकळीक दिवपी आदेश जारी केल्लो. उपरांत हेच वळेरे प्रमाण वेंचणूक जाली.
बार्देश देवालय प्रशासकांच्या ह्या आदेशाक अध्यक्ष आनंद भाईडकार हांणी आव्हान दिवन उच्च न्यायालयांत १२ तारखेर याचिका दाखल केल्ली. हातूंत गोंय सरकार, मुख्य सचीव, बार्देशचे मामलेदार आनी बोडगेश्वर देवस्थानाचे नवे पदाधिकारी आशिल्ले अध्यक्ष अॅड. वामन पंडित, उपाध्यक्ष अमेय कोरगांवकार, सचीव हरिश्चंद्र उर्फ सुशांत गांवकार, सहसचीव कुणाल धारगळकार, भांडारी श्यामसुंदर पेडणेंकार, उपभांडारी विशांत केणी, मुखत्यार राजेंद्र पेडणेंकार आनी उपमुखत्यार साईनाथ रावळ हांकां प्रतिवादी केल्ले.
ताचे पयलीं वेंचणुकेचे फाटभूंयेर २० जानेवारीक देवस्थानच्या कार्यकारी मंडळा वतीन समिती सचिवांनी देवालय प्रशासक आशिल्ले बार्देश मामलेदार अनंत मळीक हांचे कडेन म्हाजन वळेरी सादर केल्ली. हातूंत २५४ नव्या म्हाजनांचो आसपाव केल्लो. २३५८ नंबरां प्रमाण १४१६ जाणांची ही वळेरी. तशेंच ही वळेरी अध्यक्षांचे मान्यताये बगर प्रशासकांक सादर केल्ली. हो प्रकार समजले उपरांत ह्या उरिल्ल्या नव्या म्हाजनांच्या नांवांक कांय म्हाजनांनी आक्षेप घेवन हीं नवीं नांवां नावे वेंचणूक प्रक्रियेंतल्यान काडून उडोवपाची मागणी केल्ली.
उपरांत प्रशासकांचे सुचवणे वेल्यान देवस्थानाच्या अध्यक्षांनी ११६२ म्हाजनांची वळेरी सादर केल्ली. तरीय प्रशासकांनी देवस्थानाच्या सचिवान सादर केल्ल्या १४१६ जाणांचे म्हाजन वळेरेक मान्यताय दिवन वेंचणूक घेतली. आनी ह्याच नव्या २५४ म्हाजनांच्या मदतीन एप्रिल २०२५ ते मार्च २०२८ ह्या तीन वर्सांच्या काळाची समिती निवडून आयिल्ल्याचो दावो हे याचिकेंत केल्लो.
मात हे खातीर देवस्थान समितीची बसकाच जावंक नाशिल्ली. तशेंच म्हाजन वांगडीपद नुतनीकरणाच्या निमाण्या दोन दिसा ३० आनी ३१ डिसेंबराकूय नव्या म्हाजनांच्या नांवांचो देवस्थानान म्हाजन वळेरेचो आसपाव केल्लो. मात ते खातीर म्हाजन वांगडीपद नुतनीकरणा खातीर लागू केल्लें वळखपत्र वा रगताच्या नात्यांतल्या वांगड्यांचें वळखपत्र सादर करपाची अट नव्या म्हाजनांक लागू करूंक नाशिल्ली.
तशेंच म्हाजन कायद्या प्रमाण देवालये प्रशासकांक म्हाजनांक मतदानांत वांटो घेवपाची मान्यताय दिवपाचो कसलोच अधिकार ना. फकत देवस्थान समितीकूच हो अधिकार आसा. प्रशासकांक फकत सुरळीत वेंचणूक प्रक्रिया लढोवपाचो अधिकार आसा, असो दावो हे याचिकेंत केल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
