भांगरभूंय | प्रतिनिधी
म्हापशें: म्हापशेंच्या श्रीदेव बोडगेश्वराची जात्रा 24 जानेवारीच्यान सुरू जातली. हे जात्रेंत देवाक भांगराचें आसन दिवपाचो देवस्थान समितीचो विचार आसा. हाचेर अजून मुळाव्या पांवड्याचेर चर्चा चल्ल्या. पोरूं 67 लाख रुपया खर्च करून भांगराचो दांडो देवाक अर्पण केल्लो. भांगराचें आसन दिवपाचो संकल्प पुराय जाल्यार तें अंदूंचे जात्रेचें मुखेल आकर्शण थारतलें.
म्हापशेंकारां वांगडा सगळ्या भाविकांचो राखणदार म्हूण श्रीदेव बोडगेश्वराची नामना आसा. हेच खातीर दर वर्सा जानेवारींत जावपी हे जात्रेक सुमारा भायर गर्दी जाता.
जात्रे निमतान सप्तभर फेरी भरता. ते भायर मनरिजवणेचे खेळूय थंय दवरतात. जात्रे निमतान सदाचें पुजे वांगडाच भजन, दशावतारी नाटकां आनी हेर सांस्कृतीक कार्यावळींचें आयोजन करतात. दरदिसा विवीध संघटणां वतीन सत्यनारायण म्हापुजेचें आयोजन करतात. भजन, फुगडी सर्तीय जातात.
भक्तांची मनोकामना पुराय करपी देव म्हूण श्रीदेव बोडगेश्वराची नामना आसा. पुर्तुगेज काळांत जेन्ना लायटी नाशिल्ल्यो तेन्ना रातच्या 10 उपरांत श्रीदेव बोडगेश्वर देवळा कडेन येतना ताच्या हातांत पेट्टी मशाल खूब जाणांनी पळयल्या. उजवाडान दोळे दिपकावचे, असो चकचकीत उजवाड ते मशालींतल्यान भायर सरता. म्हापशेंच्या रक्षणा खातीर देव रातभर भोंवता. वाट चुकिल्ल्या एकाद्याक तो वाट दाखयता. अश्यो खूबश्यो आख्यायिका आसात. श्रीदेव बोडगेश्वराच्या कृपाआशिर्वादाची शक्त आतां फक्त म्हापश्यां पुरती मर्यादीत उरूंक ना, ती पयस पयस मेरेन पावल्या. ताका लागून पुराय गोंयांतले हजारांनी लोक जात्रेक येतात. ताचे जात्रेंत खोसयेक ओतो आनी भक्तांचो म्हासागर आयिल्लो आसता. अंदूं ही जात्रा 24 जानेवारीच्या सुरू जाता. ताची तयारी पुराय जाल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
