भांगरभूंय | प्रतिनिधी
भांगरभूंय । प्रतिनिधी
पणजीः हणजुण हांगचे जमनीच्या पूर्वजांची बोगस जल्म आनी मरण प्रमाणपत्रां तशेंच हेर दस्तावेज तयार करून ही जमीन हडप केल्ले खातीर विशेश चवकशी पंगडान (एसआयटी) मालीम- बेती हांगच्या नूर फैजल भटकर (41) हांका अटक केल्या. पुलीस कस्टडी खातीर ताका शेनवाराक म्हापशेंच्या पयलो वर्ग न्यायालयांत उबे करतले.
खोर्ली- म्हापशें हांगच्या जेनिफर कारास्को आनी सिसिनो कारास्को हांणी केल्ले कागाळे वयल्यान एसआयटीन ही कारवाय केल्या. तांच्या पूर्वजांची हणजुण्या सर्वे नंबर 504-10त जमीन आसा. ही जमीन आपल्या ताब्यांत आसा अशी म्हायती दिवपी नोटीस एके बँकेन थंय लायिल्ली. ताची म्हायती एकल्यान कारास्को हांका दिली. तांणी बँकेंत वचून चवकशी केल्या उपरांत तांका आकें-मडगांव हांगच्या सलीम शेक हाणे ही जमीन हणजूण हांगच्या मेलवीन लोबो हांचे कडल्यान विकती घेतल्या अशी म्हायती तांकां मेळ्ळी.
कारास्को हांच्या पूर्वजाक मुंबयत मरण आयिल्ले तरीय तांकां गोंयांत मरण आयिल्लाची नोंद म्हापशें नगरपालिकेंत केल्ली. मेलवीन लोबोन आपूण जमनीचो वारस आशिल्ल्याचें सांगून म्हापशेंच्या उपनिबंधकाच्या कार्यालयांत सलीम शेख हाच्या नांबान सेलडीड केलें. हे उपरांत कारास्को हांणी हणजूण पुलीस स्टेशनांत कागाळ केली. ती एसआयटी कडेन वर्ग केल्या उपरांत तांणी चवकशी सुरू केली. उपनिरीक्षक प्रितेश मडगांवकारान मेलवीन आनी सलीम हांचे सयत हेरा आड गुन्यांव नोंद केलो. जमीन हडप प्रकरणातलो मुख्य सूत्रधार मोहम्मद सुहैल शफीची घरकान्न अंजुम शेख हिण ही जमीन तिच्या नांवार केल्ल्यान तिका अटक केल्ली. ही जमीन बेती हांगच्या नूर फैजल भटकर हाणे विकल्ल्याचें सामकार आयल्या उपरांत ताका अटक केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
