भांगरभूंय | प्रतिनिधी
सावदां, सुकणी हे मनशांचे जिणेचे वेगळावं नजो, अशे घटक. रानवटी जीव जावं वा पाळीव प्राणी सगळ्यांची ही सांखळ आमचें पर्यावरण सुगूर दवरता. ताची उदरगत करता. मात, आमी म्हणपाक जाय, तशें हे मोनजाती कडेन लक्ष दिवंक ना. नाजाल्यार तांचो आंकडो देंवचो नाशिल्लो. सावदांची राखण, संवर्धन करपाक मागीर प्राणीसंग्रहालयां, अभयारण्यां उबारलीं. तरीय कांय वेंचीक जागे सोडल्यार, हेर कडेन जनावरां तशीं उणींच म्हणचीं पडटलीं. आयजूय कात, शिंगां, सुळ्यां खातीर प्राण्यांचो कांस जाता. कांय रानां जीव तर दुर्मीळ जाल्यात. कांय सोंपल्यात. गोंयच्या बोंडला अभयारण्याच्या मास्टर प्लानाक केंद्र सरकारान मान्यताय दिल्या. सावदांची राखण जातलीच, पूण चडांत चड पर्यटकांक आकर्शित करपाक बोंडला नवे न्हंवरे सारकें नटल्लें. रेस्टाॅरंट, रिक्रिएशन पार्क, बाग, लोकांची रावपाची तजवीज….. बोंडलाक बरे दीस येतले, अशें दिसता.
बोंडला टायगर सफारी सुरू करपाचो म्हत्वाकांक्षी विचार गोंय सरकारान उक्तायला. तसो प्रस्ताव आसा. मात, थंय पयलीं वाग येवपा खातीर तशी सुविधा तयार करची पडटली. काय नवे हाडटले? गोंयांत येतात, ते कर्नाटकाचे पर्यटक वाग अशें कांय म्हयन्यां पयलीं छापून आयिल्लें. म्हणटकच ह्या सफारींत येवप काय ना, तें हे टुरिस्ट वागूच थारायतले काय? वागांची सफारी करतलो जाल्यार उणोच 40 हेक्टर (0.4 चौखण किलोमिटर) जागो जाय. तशें पळोवंक गेल्यार तो उणोच. भारतांत साबार कडेन वागांच्यो सफारी आसात. मानस (आसाम) 3150 चौ. किमी, इंद्रावती (छत्तीसगढ) 2799 चौ. किमी, मेळघाट (महाराष्ट्र) 2768 चौ. किमी, नागार्जुन (आंध्र) 2595 किमी. सगल्यांत ल्हान सफारी आसा ती श्रीशैलमांत (तामिळनाडू), फक्त 80.60 चौ. किमी. संवसारांतली सगल्यांत व्हडली टायगर सफारी आसा ती काचिन- म्यानमारांत. 21 हजार 890 चौ. किमी. म्यानमार सरकारानूच हो आंकडो दिला. हाचे वयल्यान आमच्या गोंयांत चडांत चड कितली व्हडली टायगर सफारी बांदूंक मेळटली हाचो अदमास प्राणीमोगींनी करचो. ती आमकां परवडली काय ना, हो वेगळो मुद्दो. बोंडलाचो आंवाठ 8 चौ. किलोमिटर इतलो आसा.
बोंडला वाग, शिंव, बिबटे, सांबर, रानदुकर, अस्वल अशे जायते प्राणी हाडपाचो निर्णय जाला. तांचे खातीर पांजरे बांदपाचें काम रोखडेंच सुरू जातलें. हो मास्टर प्लॅन केंद्रीय प्राणी संग्रहालय प्राधिकरणाच्या मार्गदर्शक तत्वां प्रमाण तयार केला. जनावरां हाडपाक कोण हरकत घेवचो ना, मात तीं धडधाकट, जिवीं उरतलीं, तांकां दोन वेळचें जेवण मेळटलें, हाची खबरदारी घेवची पडटले. हाचे पयलीं जायते प्राणी बोंडला आयले आनी (वयर) गेले. तशें जावचें ना, हाची जतनाय घेवची पडटली. वागाचो वर्सा भितर बुकलो जावन उपकारचें ना. मनशांक जांचो धोको ना, अशे प्राणी, सुकणी आपुण जावन बोंडला येवचीं. करमळेच्या तळ्यार शेंकड्यांनी प्रजातीचीं सुकणीं येतात. तांकां कोण बँड घेवन आमंत्रण दिवपाक वचना. माय तापपाक लागलो काय तमिळनाडूंतले शिमे वयले हती केरळाची वारी करतात. कारण थंय तांकां खावपाक आनी पिवपाक जाय तितलें अन्न, उदक आसा. गोंयाक हतयांचो वायट अणभव आसा. बोंडला अभयारण्यांत उदक, पालो, तणाची वेवस्था केल्यार ताचेर जगपी प्राणी (तशेंच सुकणीं) आपूण जावन येतले. गवे, हरणां, बिबटे, माकड, किंग कोब्रा, रानदुकरांचो आंकडो वाडचो म्हूण मादी आनी नराच्यो जोडयो हाडपाचें रानां अधिकाऱ्यांनी थारायलां खरें, पूण हे प्राणी पोटा फाटल्यान गांवांनी येवचे नात, हाचेर दोळ्यांत तेल घालून म्हणटात तशें लक्ष
दवरचें पडटलें.
गोंयांत येवपी पर्यटकांक दर्या वेळो आवडटात. मात, भुरग्यांचो आवडीचो पिकनीक स्पाॅट हो बोंडला. पयली ते धावी यत्ता सोंपता म्हणसर 10 वर्सांच्या काळांत राज्यांतल्या सगल्या शाळांची पिकनीक चार फावटीं तरी बोंडला वता. येरादारीची तजवीज जाल्यार बोंडला येवपी राज्यांतले पर्यटक वाडूं येता. ते खातीर दरेका तालुको शारांतल्यान म्हयन्यांतल्यान दोन फावट बस सोडूं येता. देखीक वाळपय ते बोंडला! दोन पायांच्या मनीस प्राण्या खातीर बोंडला सगलें कितें करचें, पूण चड भर हो मोनजातीचेर आसचो! केंद्रीय रानां मंत्रालयान बाॅल गोंयच्या रानां खात्याक पास केला, आतां वेळ वगडायनासतना गोल करप आमच्या हातांत आसा!
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
