भांगरभूंय | प्रतिनिधी
आयआरबी मुख्यालयांत जातलें समुपदेशन सत्र
पणजी: भारतीय राखीव दळाच्या (आयआरबी) 24 सोरो पियेवपी आनी बेशिस्त पुलीस कॉन्स्टेबलांचेर शिस्तीचो बडगो उबारला. ह्या प्रकरणांत संबंदीत कर्मचाऱ्यांची सुदारणा करपा खातीर आल्तीन हांगासरल्या आयआरबी मुख्यालयांत समुपदेशन सत्र आयोजीत करतले. हे विशींचो आदेश आयआरबीचे कमांडन्ट बॉस्को जॉर्ज (आयपीएस) हांणी जारी केला.
जारी केल्ल्या आदेशा प्रमाण भारतीय राखीव दळाच्या (आयआरबी) कदंब, मावळिंगे, चंद्रेश्वर, वाघेरी कॅम्प आनी उत्तर गोंय पर्यटक विभागांतल्या पुलीस कॉन्स्टेबलांक सोऱ्याचें वेसन, दांडी मारप, वेंचणूक सेवे वेळार गैरहाजीर रावप तशेंच हेर वायट संवयो आशिल्ल्याचें मुखार आयिल्लें. ते प्रमाण वयल्या कॅम्पांतल्या मुखेल्यांक कर्मचाऱ्यांची वळेरी तयार करपाक सांगिल्ली.
ते प्रमाण आयआरबीचे कदंब कॅम्पांतले 14, चंद्रेश्वर कॅम्पांतले पांच, वाघेरी कॅम्पांतले तीन पुलीस कर्मचारी जाल्यार मावळिंगे आनी उत्तर गोंय पर्यटक विभागांतले दरेकी एक कर्मचारी मेळून 24 कर्मचाऱ्यांची वळेरी तयार केल्या. ह्या कर्मचाऱ्यांक वयल्यो वायट संवयी सोडोवपा खातीर आल्तीन हांगासरल्या आयआरबी मुख्यालयांत समुपदेशन सत्र आयोजीत केलां. ते खातीर वयल्या कर्मचाऱ्यांक आयज (बिरेस्तारा) सकाळीं णव वरांचेर मुख्यालयांत हजर रावपाचो आदेश जारी केला.
हाचे बगर जारी केल्ल्या आदेशा प्रमाण, आयआरबीचे पुलीस उपनिरिक्षक दिनानाथ मोनकार हांचे कडेन जापसालदारकी दिल्या. तांणी कर्मचाऱ्यांची सकाळीं 9.30, दनपारां 12.30, 3 आनी सांजवेळा 6 वरांचेर हजेरी नोंदोवपाचो आदेश जारी केला. तशेंच वयल्या कर्मचाऱ्यांक सकाळीं 9.30 ते सांजवेळा 6 वरांचेर दंगल विरोधी साहित्या सयत गणभेसांत हाजीर रावपाक सांगलां. जाल्यार रातच्या वेळार संबंदीत कर्मचाऱ्यांक आयआरबीच्या कदंब कॅम्पांत हाजीर रावपाक सांगलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
