भांगरभूंय | प्रतिनिधी
कविता ट्रस्टाच्या कविता फेस्ताची सतरावी आवृत्ती 8 जानेवारीक कवी स्टॅनी बेळाच्या घरच्या आंगणांत जाली. कोंकणी साहित्यीक, संपादक ऑस्टीन डिसोजा प्रभू, गोंय कोंकणी भाशा मंडळाची अध्यक्ष अन्वेषा सिंगबाळ, स्टॅनी बेळा हांणी कविता ट्रस्टाचे अध्यक्ष किशू बार्कूर आनी कार्यदर्शी एवरेल राॅड्रिगस हांच्या सांगाता फुलां पाकळ्यो वार्यार उबोवन फेस्ताचें उक्तावण केलें.
“कविता ट्रस्टान केरळाचे मातयेंत कविता फेस्त मांडून हाडलां म्हूण आयकून खूब संतोस जालो. कविता ट्रस्ट कोंकणी कवितेचो सुवाद संवसाराच्या कोनशांक पावोंवच्यांत निरंतर वावुरत आसा. कोंकणींत आसची विविधताय एकामेकां समजून घेंवच्याक आनी कोंकणी बोंदेरा खाल सांगाता येंवच्याक असले कार्यक्रम जावपाक जाय, ” अशें फेस्ताचें उक्तावण केले उपरांत ऑस्टीन प्रभून सांगलें.
अन्वेशा सिंगबाळान सांगलें, “फाटल्या जायत्या वर्सां थावन हांव कविता फेस्तांनी वांटेकार जाता. असले कार्यक्रम आमकां कोंकणी लोकांक एके सत्रे पोंदा हाडटात. कोंकणी लोकाक कोंकणी कविता आनी कवीं थंय आकर्षीत करच्यांत कविता ट्रस्टाचो वावर मोटो आसा आनी तांतून तांणी येश मेळयलां. फाटल्या वर्सांनी भुरग्यांनी कविता ट्रस्टाच्या स्पर्धांनी भाग घेवप हें एक ट्रेंड जावन पडलां. अशेंच फुडें गेल्यार कोंकणींत आनिक गिरेस्त साहित्य रचना जातल्यो हातूंत दुबाव ना”
उक्तावणा उपरांत नेल्सन अनी लवीना रोड्रिक्स प्रायोजीत णववी चाफ्रा देकोस्ता स्मारक कविता सादरीकरण सर्त आनी व्हडांच्या विभागांत चवथी अखील भारतीय कविता वाचन सर्त चल्ली.
संवादां सवें फेस्ताचे कार्यावळींची सुरवात जाली. कासरगोड जिल्ल्याचे कोंकणी मुखेली आनी बरोवपी अॅड. संतोश पेर्ला आनी कवी, संपादक विल्सन कटील हांणीं संवादांत वांटो घेतलो. कविता ट्रस्टाचे ट्रस्टी जावनासच्या विल्लियम पायस आनी टैटस नोरोन्हान संवाद चलोवन वेलो. मागीर कोंकणी कवितेचो रियालिटी शो ‘बिरिबिरी पावस’ अंतिम हंताच्या स्पर्धकां वांगडा कविगोष्टी सादर जाली.
फेस्ताचे सोंपवणे कार्याक कोंकणी भाशा मंडळाचे आदले अध्यक्ष प्रशांत नायक तशेंच गीतकार रत्नमाला दिवकार मुखेल सोयरी आसलीं. ह्याच वेळार कवी विल्सन कटील हाचो कविता पुंजो ’चितुरलेचे अच्छे दिन’ लोकार्पण जालो.
“कोंकणी भाशेक एका राज्या पुरती सीमीत करुंक जायना. ताची विस्ताराय विशेस आसा. अशें विस्तारायेन भरल्ल्या कोंकणी संसारांत गिरेस्त साहित्य आसा. साहित्य रच्चें अती कष्टांचें म्हळ्ळो एक काळ आसल्लो. छंदबद्ध म्हळ्ळ्या चौकट्टा भितर काव्याचें रचन जातालें. ह्या खातीर कविंनी विशेस मेहनत घेवची पडटाली. शब्दांचें भंडारच तांचे थंय आसा जाय आसलें. पूण कविता छंदमुक्त जाली तेन्ना सावन काव्यांनी विचार चड झळकूंक आरंभ जाले. उतरांक आसची बंधनां ना जाली. कविता निराळ जाली.” अशें प्रशांत नायक हाणीं सांगलें.
रत्नमाला दिवकार हिणें कविता ट्रस्टाच्या कविता सादरीकरण स्पर्धकांक शाबासकी दिली.
ह्याच वेळार कवयत्री इंदू गेरुसोप्पेक 2022 व्या वर्साचो मथायस कुटम कविता पुरस्कार प्रदान केलो. तिचे गैर जेरे खाल तिची प्रतिनिधी जावन ज्योती पै हिणें शॉल, यादिस्तीका, मानपत्र आनी रुपय 25,000 ची चेक हस्तांतर केली. श्वेता पै मंजेश्वर हिणें इंदू गेरुसोप्पेन पाटयिल्लो संदेश वाचलो.
उपरांत कविता सादरीकरण स्पर्ध्याच्या भुरग्यांच्या विभागांत पयलें स्थान आपणायिल्ल्या निनिशा प्रिशा मोंतेरो, दुसरें स्थान आपणायिल्ल्या आर्यन मंगलदास भट आनी तिसरें स्थान जोडल्ल्या आराध्य पै रायतुरकार हांकां प्रमाणपत्र तशेंच यादिस्तीका दिवन मान केलो. सना साटेलकार आनी निशेल पर्ल मोंतेरो हांकां भुजावणेचीं इनामां फावो जालीं.
व्हडांच्या विभागांत अंबेश तळवडकाराक पयलें स्थान लाभलें तर प्रीतन रेनिटा पिरेरान दुसरें स्थान आपणायलें. नीता ए. परब हिका तिसरें स्थान फावो जालें.
बेळांत फेस्ताचें आयोजन करुंक मुखेल्पण घेतल्ल्या मार्गरेट क्रास्ता, वीणा वायलेट आनी स्टावेनो शेल्डन हांकां
कविता ट्रस्टा तर्फेन विशेश मान केलो.
कविता ट्रस्ट अध्यक्ष किशू बार्कूरान सकाळींच्या आदेसावेळार कविता ट्रस्टाच्या मिसांवा फाटलो उद्देश सभे हुजीर मांडून सर्वांक येवकार दिल्लो तर, सांजेच्या समारोप कार्याक कार्यदर्शी एवरेल रोड्रीगसान स्वागत केलो.
वीणा वायलेट, वाणी मार्टीस, प्रियाल क्रास्ता आनी रिशा मार्टीस हांणी कविता ट्रस्टाचें ध्येय गीत गायलें. फेस्ताच्या सुरवातेच्या पुर्शांवाक सेंट मेरीस इस्कोलाच्या भुरग्यांनी बॅंड वाजंत्रांनी सहकार दिलो. ट्रस्टी वितोरी कार्कळान उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
