भांगरभूंय | प्रतिनिधी
भांगरभूंय । प्रतिनिधी
बेळगांवः नवें वर्स फुलोवपा खातीर गोंयांतल्यान ट्रकांतल्यान बेळगांवां हाडिल्लो 25 लाख रुपये मोलाचो सोरो बेळगांवच्या अबकारी अधिकाऱ्यांनी जप्त केलो. मल्टि एक्सल ट्रकांतल्यान अळम्यांच्या बियांच्या पोतयांत घालून हाडल्लीं सोऱ्याचीं सुमार 600 बॉक्सा उत्तर कर्नाटकांत व्हरताले अशें बेळगांवचो अतिरिक्त अबकारी आयुक्त वाय मंजुनाथ हाणे पत्रकारांक सांगलें. गोंयांतल्या सोरो हाडटात अशी आमकां म्हायती मेळल्ल्यान काकाटी हांगा शुक्राराक सकाळी 6 वराचंर आमी ट्रक आडावन तपासणी केली अशें ताणे सांगलें.
ह्या प्रकरणांत यारगट्टी गांवांतलो कुतुबुद्दीन आनी बागलकोट हांगच्या रेहमान साब हांकां अटक केल्या. गोंयांत रॉयल ब्लू ब्रँडाच्या सोऱ्याचें उत्पादन जायना. जप्त केल्ल्या सोऱ्यांत ह्या सोऱ्याचो आसपाव आशिल्ल्यान आमी गोंदळांत पडल्यात अशें ताणे सांगलें. गोंयांतल्या जावपी बेकायदेशीर सोऱ्या येरादारीचेर आमी विशेश पंगड तयार करून नदर दवोरल्या. फाटल्या दोन म्हयन्यांत गोंयांतल्यान हाडिल्लो सोरो जप्त करपाची ही पांचवी खेप आसा. आतां मेरेन आमी 2 कोटी मोलाचो गोंयांतल्यान हाडिल्लो सोरो जप्त केला अशें मंजुनाथ हाणे सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
