भांगरभूंय | प्रतिनिधी
फोंडें: गणेशनगर-बेतोड्यां ट्रक आनी रिक्षा हांचे मदीं जाल्ल्या अपघातांत एक बायल जखमी जाली, जाल्यार ढवळे धांवते मोटारीचो टायर फुटून दुभाजकाक धपको दिल्ल्यान मोटार लवंडली. हातूंत दोग जाण किरकोळ जखमी जाले. जखमींचेर उपजिल्हो हॉस्पिटलांत उपचार केले. फोंडें पुलिसांनी अपघाताचो पंचनामो केला.
मंगळारा दनपारां 12 वरांच्या सुमाराक जीए 05 टी 3743 क्रमांकाची रिक्षा बोरी सावन बेतोडें बायपास रस्त्यान खांडेपारा वताली. गणेशनगरांत पावतकूच विरुद्ध दिकेन येवपी जीए 05 टी 6059 क्रमांकाच्या ट्रकाचो धपको रिक्षाक बसलो. हातूंत रिक्षेंत बशिल्ली पिएदाद रोड्रिगीश (47, वाघुर्में-फोंडें) ही बायल जखमी जाली. जखमीक अदीक उपचारा खातीर 108 अॅम्ब्युलन्सींतल्यान उपजिल्हो हॉस्पिटलांत व्हेली. दोतोरांनी उपचार केले उपरांत जखमी बायलेक घरा धाडून दिली.
उपरांत दनपारां 1.45 वरांच्या सुमाराक ढवळे जंक्शनार पावतकूच जीए 05 डी 5145 क्रमांकाचे मोटारीचो टायर फुटलो. ताचे उपरांत बोरी सावन ढवळे वचपी मोटारीचो धपको रस्त्या वयल्या दुभाजकाक बशिल्ल्यान मोटार लवंडली. थळाव्यांनी मोटारींत आडकून उरिल्ल्या दोगांक भायर काडले. त्या दोगांकूय उपजिल्हो हॉस्पिटलांत व्हरतकूच दोतोरांनी तांचेर उपचार केले उपरांत तांकां घरा धाडून दिले. पूण तांचीं नांवां मात समजूंक शकलीं नात.
मजगतीं, धारबांदोड्यां संजिवनी साकर कारखान्या कुशीच्या रस्त्यार आयतारा रातीं कंटेनर मोटारीचेर लवंडिल्ल्यान जाल्ल्या अपघातांत फोंडें पुलिसांनी कंटेनर ड्रायव्हर कक्रा गौडा (38, बंगळुरू) हाचे आड गुन्यांव नोंद करून अटक केली. अटक केल्ल्या ड्रायव्हराची जामिनार सुटका केली. अपघातांत एक तरणाट्याक जाग्यारूच मरण आयिल्लें जाल्यार चार जाण जखमी जाल्ले. जखमी मदीं कंटेनर ड्रायव्हराचो लेगीत आस्पाव आशिल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
