भांगरभूंय | प्रतिनिधी
हालींच्या काळांत सगळ्यांत चड वाडल्या ती समस्या म्हणल्यार बेकारी. दरवर्सां विंगड विंगड मळांतल्यान
कितलींशीच भुरगीं उच्च शिक्षण, पदवी घेवन पास जातात. पूण, तांतूतल्या कितल्या जाणांक नोकरी मेळटा? कितली जाणां बेकार उरतात? वा कितली जाणां घरचे परिस्थितीक वा गरज म्हूण मेळटा ती खाजगी नोकरी करतात? अशें म्हणटात कसलेंय काम करपाक लजपाचें ना…. आनी घडये तें खरेंय आसुंये. पूण एक, पदव्युत्तर पदवी मेळयिल्ल्या तरणाट्यांक तांच्या शिक्षणाच्या प्रमाण फावो ती नोकरी मेळना म्हणून ताणें दुकान वा आनीक कसलेंय सादें काम करप कितलें योग्य? देखीक एमए वा बीएस्सी जाल्लो तरणाटो च्याचो गाडो चलयता जाल्यार??
गोंय सरकारान हालींच दोन दिसांचो महा रोजगार मेळावो आयोजीत केल्लो. सरकाराच्या म्हायती प्रमाण, 15 हजारां परस चड तरणाट्यांनी नावनोंदणी केली. तातूंतल्या 5000 जाणांची पयल्या टप्प्यांत निवड जाली तर 500 जाणांक थेट नोकरी मेळ्ळी. पूण जांका नोकरी दिली, ते नोकरेंत सुरक्षीतताय आसा? काय 6 म्हयन्या उपरांत तांकां नोकरे वयल्यान काडटले वा ब्रेक दितले. तांकां पगार, कामाचीं वरां कितलीं? हो प्रश्न म्हजे सारकिल्ल्या जायत्या तरणाट्यांक पडला आसतलोच!
निती आयोगाच्या म्हणण्या प्रमाण, गोंयांत 1 लाख 10 हजार बेकार आसात. पूण, गोंयचे मुख्यमंत्री डॉ. प्रमोद सावंत म्हणटात, गोंयांत फक्त 20 हजार बेरोजगार आसात. आतां हो 20 हजारांचो आंकडो कितल्या जाणांक खरो दिसतलो? आमचें गोंय ल्हान आसा म्हूण फक्त 20 हजार बेकार आसतले, हो आंकडो म्हाका तरी खरो दिसना. गोंयच्या दरेका वाठारांत पळयल्यार कितलेंशेंच तरणाटे बेरोजगार आशिल्ले दिसतात. थोडे 5- 6 हजारांक काम करतात, उरिल्ले दिसरात बेकार भोवतना दिसतात. जाल्यार मुख्यमंत्र्यान हो खंयचो आकडो दिलो?
भुरगीं ल्हानाचीं व्हड जातात. आवय- बापूय तांकां जाय तितलें शिकयतात. कांय घरांनी तर गरीब परिस्थिती आसून लेगीत त्रास काडून आवय- बापूय भुरग्यांक शिकयतात. भुरग्यांक दिसता आपूण शिकचें, बरी नोकरी मेळोवची. पूण जेन्ना भुरग्यांचें शिकून जाता, तेन्ना तांकां फावो ती नोकरी मेळना. कारण आतां नोकऱ्यांचे खेळ चल्ल्यात. सद्या सगळेंच वळखी आनी पयश्यांचेर चल्लां. मान्य आसा, दरवर्सां कितलेशेंच तरणांटे पदव्युत्तर पदवी मेळयतात. वांगडाच इतल्या जाणांक नोकरी दिवप शक्य ना. पूण, जांकां नोकरी दितात ती तरी तांच्या शिक्षणा प्रमाण, तांचे कुवत, कुशळटाये प्रमाण दिवची.
आतां आनीक सरकारान एक नेम काडला. सरकारी नोकरी मेळोवपा खातीर एक वर्सांचो अणभव आसप गरजेचो. पूण तरणाटे नोकरे खातीर खंय मुलाखत दिवपाक वतात, थंय अणभव ना म्हूण न्हयकार दितात. जर सगलेच कडेन अशें करपाक लागले तर भुरग्यांक अणभव मेळटलो तरी कसो? आनी कसलो?
बेरोजगारी हें एक कारण आसुये, जाका लागून आताची तरणाटी पिळगी चुकीचो मार्ग निवडतात. आत्महत्याचें प्रमाण फुडल्या पांच वर्सांनी वाडपाक शकता. तरणाट्यां मदीं ताण वाडला. राग, मनस्ताप, चिडचिड करतना जायते तरणाटे दिसतात. इतलें शिकून फावो ती नोकरी मेळना जाल्यार कितें फायदो? सरकारी नोकरी दियात, पूण ती तांकांच दियात जे ते नोकरेक पात्र आसात. खाजगी नोकऱ्यो खूब आसात…. आनी आताची चडशी तरणाटी भुरगीं खाजगी नोकऱ्यो करतात. कारण बेकार रावन तरी कितें करतलीं. दुसरी एक सादी पूण म्हत्वाची गजाल सांगीन दिसता. हांगा व्हड समस्या येता ती येरादारीची. खाजगी नोकरी म्हणलें की ऑफिसाची वेळ आसता सकाळीं 9 ते सांजे 6 वा 7 मेरेन. हांचे उपरांत येरादारी उणी आशिल्ल्या कारणान यो- वच करपाची समस्या उबी जाता. सांजवेळा साता उपरांत बशी शारां, मुखेल मार्ग सोडल्यार गांवांनी, आडरस्त्यांचेर येरादारी नासता. आयतार, सणा- परबांच्या दिसा तर विचारपाक नाका!!
भुरगी 26 ते 27 पिरायेची जालीं तरी तांकां फावो ती नोकरी मेळना. गोंयांत आयज सुद्धा कितलींशींच तरणाटी आसात, जी हांगा थंय सरकारी तशेंच बरे खाजगी नोकरी खातीर खटपट करतात. पूण फक्त गुणवत्तेच्या बळग्याचेर तांकां बरी नोकरी मेळत, हाची खात्री ना. देखून सद्या तरणाट्यां मदी बेकारी ही एक व्हडली समस्या जाल्या. हाचेर बेगीन उपाय काडपाक
जाय.
प्राची गांवकार
सुर्ला- सत्तरी
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
