भांगरभूंय | प्रतिनिधी
एकल्याक जाग्यारूच मरण; एकलो जखमी; कुडचड्यार बुधवारा मध्यान रातीं घडली घडणूक
मडगांव: कुडचडें हांगासरल्या माड-बाणासाय वाठारांत बेकायदो रेंव कडपी कामगारांचेर बुधवारा मध्यान रातीं एक वरांच्या सुमाराक फारपेट जालो. ह्या फारपेटांत एका कामगाराक मरण आयलें, जाल्यार दुसरो कामगार गंभीर जखमी जालो. फोगट प्रकरणांत राज्याचे कायदाे सुवेवस्थेचेर प्रस्न उप्राशिल्लो आसतनाच आतां गांवांतूय फारपेट जाल्ल्यान एकूच खवदळ पडला.
कुडच्यार माड बाणसाय वाठारांत व्हड्याचो वापर करून बेकायदो रेंव काडपी तीन कामगारांचेर फारपेटीची घडणूक घडली. हे घडणुकेंत रेंव हाडपा खातीर व्हडें घेवन वचपी कामगारांचेर अनवळखी मनशान फारपेट केलो. ह्या फारपेटांत युसूफ आलम (23) ह्या झारखंडच्या कामगाराक जाग्यारूच मरण आयलें. जाल्यार महंमद साहू (33) हो कामगार गंभीर जखमी जालो. ताचेर गोंय वैजकी म्हाविद्यालयाच्या हॉस्पिटलांत (गोमॅकॉ) उपचार सुरू आसात. ह्या फारपेटांत एक कामगार वाटाविल्ल्याची म्हायती पुलिसांनी दिली.
पुलिसांनी दिल्ले म्हायती प्रमाण फारपेटीची घडणूक बुधवारा मध्यान रातीं घडली. घडणूक थळार हाजीर आशिल्ले पुलीस अधिक्षक सॅमी तावारीस हांणी घडणुके विशीं उलयतना सांगलें, बुधवारा रातीं सुदार देड वरांच्या सुमाराक कुडचडें पुलिसांक कुडचडें भलायकी केंद्रांतल्यान भलायकी केंद्रांत दोगां जाणांक हाडल्यांत आनी तांकां आर्माची गुळी लागल्या आनी एकल्याक मरण आयलां, जाल्यार दुसरो जखमी आसा अशी म्हायती दिली. भलायकी केंद्रांतल्यान मेळिल्ले म्हायतीच्या आदारान पुलीस घडणूक थळार पावले आनी पुलिसांनी घडणूक थळाची पळोवणी केली. घडणूक थळार ल्हान ल्हान गजालींची म्हायती पुलिसांनी घेतल्या आनी घडणुकेचो पंचनामो केला.
फारपेट करपा फाटल्यान नेमकें कसलें कारण आसा हाचो सोद पुलीस घेतात. फारपेट जाल्ल्या गुन्यांवाचे ठिकाण समजून घेवपा खातीर घडणूक थळार संभाव्य पुरावे एकठांय करपा खातीर फॉरेन्सीक पंगडाकूय आपयलें अशें अधिक्षक सॅमी तावारीस हांणी सांगलें.
कामगारांचेर जाल्ल्या फारपेटांत युसूफ अलम ह्या झारखंडांतल्या 23 वर्सा पिरायेच्या तरणाट्याक मरण आयलें. जाल्यार ताचे बरोबर आशिल्ल्या महम्मद साहू ह्या 33 वर्सा पिरायेच्या तरणाट्या कामगाराक गंभीर दुखापत जाल्या. ताका मुळाव्या उपचारा उपरांत बांबोळे गोमॅकाँत धाडून दिला. थंय ताचेर उपचार सुरू आसात. तिसरो कामगार घडणूक थळार हाजीर आशिल्लो. पूण ताका कसलीच दुखापत जावंक नाशिल्ल्याचें पुलिसांनी सांगलें.
घडणूक थळार संबंदीत व्यक्तीच्या उपस्थिती विशीं पुलिसांक विचारलें तेन्ना तांणी सांगलें, माड बाणसाय हांगा न्हंयेच्या पात्रांत बेकायदो रेंव काडटात. मरण आयिल्लो युसून आलम, जखमी जाल्लो महम्मद साहू हांचे सयत आनीक एकलो कामगार व्हड्यांतल्यान रेंव काडपाचें काम करताले. अनवळख्या कडल्यान फारपेट जाल्ल्यान जखमी जाल्ल्या दोगां कामगारांक घेवन तिसऱ्या कामगारान तांकां न्हंयचे देगेर हाडले.
उपचारा खातीर व्हरता आसतना एकल्याक मरण आयलें, जाल्यार एकल्याचेर उपचार केले. फारपेट करपी मनशा कडेन कसले तरेचें आर्म आनी गुळयो आशिल्ल्यो हे विशींचो तपास सुरू आसा.
फॉरेन्सीक पंगड घडणूक थळा वयल्यान हाताचे ठशे आनी हेर गरजेच्या पुराव्याचो सोद घेतात अशी म्हायती पुलीस अधिक्षक सॅमी तावरीस हांणी दिली. तांचे सयत विभागीय पुलीस अधिक्षक निलेश राणे, शिवेंदू हे घडणूक थळार हाजीर आशिल्ले.
कुडचड्यार सुरू आशिल्ल्या बेकायदो रेंव काडपाच्या वेवसायांत एका कामगाराक मरण आयिल्ल्यान गोंय काँग्रेस प्रदेशाध्यक्ष अमीत पाटकार हांणी दुख्ख उक्तायलां. गोंयांतली सद्या कायदो सुवेवस्था कोसळ्ळ्या. तशेंच अशे तरेचें कायद्याचें उल्लंघन करपी घडणुको आमदार वा मंत्र्यांच्या आशिर्वादा बगर जावंकूच शकनात. तातूंत कुडचडेंचे आमदार गोंयचे पर्यावरण मंत्री आनी कायदो मंत्री आसून लेगीत बंदी घाल्लो बेकायदो वेवसाय कुडचडें मतदारसंघांत कसो सुरू आसा, हाची जाप मुख्यमंत्री डॉ. प्रमोद सावंत हांणी दिवची हांणी हो फारपेट कोणे केला ताका ताकतिकेन अटक करची अशी मागणी अमीत पाटकारान केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
