बेकायदो चिऱ्यां खणींचेर आतां खर कारवाय

भांगरभूंय | प्रतिनिधी

सत्तरीच्यो, दिवचलच्यो चिऱ्यां खणी रडाराचेर; दंडात्मक, फौजदारी कारवायेचे संकेत

भांगरभूंय । प्रतिनिधी

वाळपयः सत्तरी म्हालांतल्या फाटल्या कितल्याशाच वर्सां सावन चलपी बेकायदो चिऱ्या खणी सरकाराच्या रडाराचेर आसात. तांचे आड खर कारवाय करपाचें धोरण सरकारान आंखला. साबार वेवसायिकांचेर कोट्यांनी रुपयांचो दंड दितले. हे संबंदांतली कारवाय रोखडीच हातांत घेतले, अशी म्हायती मेळ्ळ्या. हाका लागून साबार वेवसायीक बेकायदेशीर चिऱ्यां खणींक लागून अडचणींत येवपाची शक्यताय आसा, अशीय म्हायती मेळ्ळ्या.

सध्या सत्तरी म्हालांतल्या साबार वाठारांनी चलपी चडश्यो बेकायदो चिऱ्यां खणी पुराय बंद आसात. मात कांय कडेन रातच्या वेळार कांय जाण चिरे काडटात, अशी म्हायती थळाव्यां लोकां कडल्यान मेळ्ळ्या. ह्या बेकायदो वेवसायांत थळाव्या तलाठीचो हात आशिल्ल्याचें थळाव्या लोकांचें म्हणणें आसा.

मेळिल्ले म्हायती प्रमाण फाटल्या सुमार पंदरा वर्सां सावन सत्तरी म्हालांत खूबश्या वाठारांनी बेकायदो चिऱ्यां खणींचो वेवसाय व्हड प्रमाणांत चलतालो. खूब कडेन सरकारी मालकीच्या जमनींतल्यान लेगीत व्हड प्रमाणांत चिरे काडटाले. खूब कडेन वेवसायिकांक सरकारी अधिकाऱ्यांचो तेंको आशिल्ल्यान तांचेर कसलेच तरेची कारवाय जायनाशिल्ली. मात आतां खण आनी भूगर्भ संचलनालयान ह्या बेकायदो चिऱ्यां खणीं आड व्हड प्रमाणांत मोहीम हातांत घेतल्या. तशेंच कांय समाज वावुरप्यीं ह्या संबंदांत उच्च न्यायालयाच्या गोंय खंडपिठांत याचिका दाखल केल्ल्यान खण आनी भूगर्भ संचालनलय जागें जालां. तांणी बेकायदो चिऱ्यां खणीच्या वेवसायांत घुस्पल्ल्यांचेर कारवाय करपाक सुरवात केल्या.

बेकायदो चिऱ्या खणींच्या माध्यमांतल्यान कांय जाणांनी खूब पयसो केला. सरकाराचे तिजोरेंत एक पयसोय भरिनासतना संबंदीत अधिकाऱ्यांक कडेन बरेंपण जोडून तांणी हो वेवसाय चालू दवरिल्लो. तांचेर आतां कारवाय जावपाची शक्यताय आशिल्ल्यान तांच्या पोटांत भंयान गुळो जाला. कारण हे संबंदांतली वळेरी ह्या संचालनालयान तयार केल्यात तातूंत सत्तरी म्हाला वांगडाच दिवचल म्हालांतल्या खूबश्या बेकायदो वेवसायिकांचीं नांवां आशिल्ल्याची म्हायती मेळ्ळ्या. तांच्या कडल्यान लाखांनी रुपयांचो दंड वसूल करतले आनी ते संबंदांतली कार्यवाही सुरू केल्ल्या, अशी म्हायती मेळ्ळ्या.

मजगतीं, ह्या संबंदांत खण आनी भूगर्भ संचालनालयान गुगलच्या आदारान ह्या संदर्भांतले सर्वेक्षण केलां. जंय बेकायदो चिऱ्यां खणींचो वेवसाय चलतालो थंयचो वाठार उध्वस्त केल्ल्याचें स्पश्ट जालां. ताका लागून खण आनी भूगर्भ संचालनालय सतर्क जालां. हे संबंदांत सर्वेक्षणाच्या माध्यमांतल्यान मेळिल्ले म्हायती वयल्यान जे तरेन चिरे काडल्यात ते तरेन दंड वसूल करतले. कांय वेवसायिकां हे संबंदांत नोटीस जारी केल्या. जाता तितले बेगीन ही दंडाची वसुली करपाचे यत्न संचालनालया कडल्यान सुरू आसात. जे वेवसायीक ह्या संबंदांत वेळकाडू धोरण आपणायतले तांचेर कायदेशीर कारवाय करतले, अशें कळ्ळां. मजगतीं, खूबश्या बेकायदो वेवसायिकांचेर ह्या संबंदांत फौजदारी खटले दाखल केल्यात. त्या संबंदांतली फुडली कारवाय रोखडीच हातांत घेतले, अशी म्हायती मेळ्ळ्या. हाका लागून सत्तरी म्हालांतल्या सुमार 100 परस अदीक जाणांचेर हे संबंदांत कारवाय जातली, अशी म्हायती मेळ्ळ्या.

15 दिसांनी कारवायेक सुरवात…?

सत्तरी म्हालांतल्या गुळेली, भिरोंडें, होंडा, पिसुर्ले, नगरगांव, खोतोडें, मोर्लें, पर्यें ह्या वाठारांत चिऱ्या खणींचो वेवसाय व्हड प्रमाणांत सुरू आसा. खूबशा पंचायत वाठारांनी सरकारी जमनींत चिरे काडप्यांचेर कायदेशीर कारवाय जातली. तशेंच जांणी आपल्यो जमनी बेकायदो चिरे काडपा खातीर दिल्यात तांचेर लेगीत कारवाय जातली. फुडल्या 15 दिसां भितर प्रत्यक्ष कारवाय करपाक सुरवात जातली, अशी म्हायती मेळ्ळ्या.