भांगरभूंय | प्रतिनिधी
सात दिसां भितर गाडे काडपाची पंचायतीची गाडेकारांक नोटीस
भांगरभूंय । प्रतिनिधी
मुरगांवः चिखली दाबोळेच्या सर्कला लागसारचे बागे मुखार गाड्यांनी अतिक्रमण केलां. नौदळान हे विशी पंचायती कडेन कागाळ दाखल केल्या. हे कागाळेक धरून पंचायतीन गाडेकारांक सात दिसां भितर गाडे काडचे, ना जाल्यार खर कारवाय करतले, अशी सचिवा वरवीं नोटीस दिल्या.
चिखले मुख्य सर्कला पसून 500 मिटर अंतराचेर आशिल्ल्या नेव्हल आर्मामेंट डेपो चिखली ह्या नौदळ कार्यालया वतीन पंचायतींत कागाळ केल्या. हे कागाळेंत म्हणलां, चिखली बागे मुखार अतिक्रमण करून उबारिल्ल्या च्यायेच्या गाड्यांक लागून नेव्हल आर्मामेंट डेपोची पूर्व गेट ते चिखली सर्कल मेरेनचो संरक्षक रस्तो आडावला. राष्ट्रीय सुरक्षेच्या दिश्टीकोनांतल्यान रस्त्याचे देगेक अतिक्रमण केल्ले गाडे काडचे खातीर गरजेची कारवाय करची. मजगतीं, ते कागाळे वयल्यान चिखली पंचायत सचिवान त्या गाडेकारांक थंयच्यान गाडे काडपाची नोटीस दिल्या.
नोटीस दिवप कितली योग्य?: गाडेकार
फाटल्या 40 वर्सां परस अदीक काळा सावन आमी हे सुवातेचेर वेवसाय करतात. आयज मेरेन ताका कोणेच हरकत घेवंक नाशिल्ली. आतां नौदळान केल्ले कागाळेक लागून आमच्या गाड्यांचेर कारवाय करपाची नोटीस पंचायतीन दिल्या. हें कितलें योग्य आसा, असो प्रस्न गाडेकारांनी उपस्थीत केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.