भांगरभूंय | प्रतिनिधी
खबरां संस्था
नवी दिल्लीः अर्जुन पुरस्कार जैतिवंत आनी बर्मिंगहॅम राष्ट्रकूल खेळां सर्तींत भांगरापदक मेळोवपी बॅडमिंटन खेळगडो लक्ष्य सेनाचेर पिरायेंत हेराफेरी केल्ल्याचो आरोप केला. प्रसार माध्यमांनी ताचे आड बंगळुरूंत पुलिसांनी एफआयआर नोंद केल्याची म्हायती दिल्या. ज्युनिअर पांवड्या वयले सर्तींत खेळपाक मेळपा खातीर ताणे आपली पिराय उणी दाखयल्ली असो ताचेर आरोप आसा.
नागराज एमजी नावचे एके व्यक्तीन कागाळ केल्या उपरांत बंगळुरू पुलिसानी लक्ष्य आनी ताच्या बॅडमिंटन अकादमीच्या कोचा आड एफआयआर नोंद केल्या. नागराज बंगळुरूंत बॅडमिंटन अकादमी चलयता. लक्ष्य बंगळुरूंतल्या प्रकाश पडुकोण बॅडमिंटन अकादमीत प्रशिक्षण घेता. एफआयआरांत लक्ष्याचो कोच विमल कुमार, बापूय धीरेंद्र सेन, भाव चिराग आनी आवय निर्मला सेन हांच्या नांवाचो आसपाव आसा. चिराग स्वता बॅडमिंटन खेळगडो आसा. बापूय भारतीय खेळां प्राधिकरणांत कोच आसा. कोच विमल हाणे लक्ष्याच्या आवय- बापायच्या सहकार्यान 2010 वर्सा लक्ष्याचें जल्म प्रमाणपत्र तयार केल्लें. त्या वेळार ताणी ताचे पिरायेत हेराफेरी केल्ली आनी ताका लागून ते पिरायेच्या गटांतले सर्तींत ताका वांटो घेवपाक मेळिल्लो असो नागराज हाचो दावो आसा. लक्ष्याचो जल्म 1998 वर्सा जाल्लो मात सरकारी नोंदींत ताचें जल्म वर्स 2001 अशें दाखयलां अशें कागाळेंत म्हणला.
मजगतीं, लक्ष्याचो कोच विमल कुमार हांणी एफआयआरांत केल्ले आरोप न्हयकारल्यात. लक्ष्याक 2010 सावन हेर भुरग्यां प्रमाण आपणे प्रशिक्षण दिल्लें अशें तांणे सांगलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
