भांगरभूंय | प्रतिनिधी
आसामान 37वे राष्ट्रीय खेळां सर्तींत पयलें भांगरा पदक जिखलें. ताणें बायलांच्या सांघीक बॅडमिंटन प्रकारांत महाराष्ट्राच्या पंगडाक 3-0 असो हारयलो. डॉ. श्याम प्रसाद मुखर्जी स्टेडियमांत जाल्ले फायनलींत आसाम पंगडान आपलो शेक दवरलो. दादल्यांच्या गटांत कर्नाटक पंगडान महाराष्ट्रा आड 3-1 अशें जैत जोडून भांगरा पदक मेळयलें.
आसामाचे अस्मिता चलिहा आनी ईशाराणी बरुआ हिणे आपल्याआपल्या एकोड्या गटांत जबरदस्त खेळ करून जैत जोडलें. ते उपरांत दोट्टी गटांत एकठांय खेळटना आदली राष्ट्रीय जैतिवंत रितिका ठाकर आनी सिमरन सिंघी हांकां होरोवन भांगरा पदक निश्चीत केलें.
अस्मितान पयले मॅचींत पुर्वा बर्वेक 21-16, 21-11 अशी हारयली. दुसरे एकोडे मॅचींत आलिशा नाईकान ईशाराणी आड पयली गेम सहज िजकली. पूण, ईशाराणीन दुसरे गेमींत जबरदस्त शॉर्ट खेळून गेम मॅचींत 1-1 अशी बरोबरी सादली. तिसरे गेमींत ईशाराणीन मध्यंतरा मेरेन 11-2 अशी व्हड आघाडी घेतली. उपरांत आलिशान कांय गूण मेळयले. पूण, हार मात तिका टाळपाक जमली ना. अखेरेक ईशाराणीन 9-21, 21-13 आनी 21-18 अशें जैत जोडलें.
दादल्यांच्या गटांतले फायनल मात उमळशीक वाडोवपी जाली. कर्नाटकाच्या एस भार्गवान एकोड्या गटांतले मॅचींत अणभवी हर्षिल दाणी आड 18-21, 21-19 आनी 21-15 अशें जैत जोडलें. दुसरे मॅचींत महाराष्ट्रान बरोबरी सादली. रोहन गुरबानी के पृथ्वी रॉयाक हारयलो.
दोट्टी गटांत एच के नितीन आनी के साई प्रतीक हे जोडयेन दीप रांभिया आनी अक्षन शेट्टी हे जोडयेक 21-12 आनी 21-14 अशा फरकान हारोवन कर्नाटकाक2-1 अशी आघाडी मेळोवन दिलें.
ते उपरांत आयुष शेट्टीन दर्शन पुजारीक 21-17, 21-17 हारोवन कर्नाटकाक भांगरा पदक मेळोवन दिलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
