भांगरभूंय | प्रतिनिधी
विद्यार्थ्यांनी कुलगुरूंक केलें निवेदन : मुख्यमंत्र्यांकूय निवेदन सादर करतले
पणजी : पयल्या आनी दुसर्या वर्सा बॅकलॉग (कांय विशयांनी नपास) आशिल्ल्या विद्यार्थ्यांक पद्वी अभ्यासक्रमाच्या तिसर्या वर्सा खातीर प्रवेश मेळिल्ल्यान विद्यार्थ्यां मुखार समस्या निर्माण जाल्या. विवीध महाविद्यालयांतल्या कांय विद्यार्थ्यांनी कुलगुरू तशेंच कुलसचिवांंक मेळून तोडगो काडपाची मागणी केली. समस्येचेर तोडगो काडून विद्यार्थ्यांक तिसर्या वर्सा प्रवेश मेळचे खातीर मुख्यमंत्री डॉ. प्रमोद सावंत हांकांय मेळटले अशी म्हायती अमेय किंजवडेकार हांणी दिली.
ह्या प्रस्नाचेर विवीध महाविद्यालयांतल्या विद्यार्थ्यांनी कुलगुरू आनी कुलसचिवांक मेळपा वांगडा गोंय विद्यापीठ विद्यार्थी मंडळानूय (जीयूएससी) कुलगुरूंची स्वतंत्रपणान भेट घेवन निवेदन सादर केलें. बॅकलॉग आशिल्ल्या विद्यार्थ्यांक तिसर्या वर्सा प्रवेश दिवचो, अशी मागणी करपी निवेदन सादर केल्ल्याची म्हायती गोंय विद्यापीठ विद्यार्थी मंडळाचे अध्यक्ष विनय राऊत हांणी दिली.
महाविद्यालयीन पांवड्यान राष्ट्रीय शिक्षण धोरणाची कार्यवाही सुरू जाल्या. एनईपीक लागून पयल्या आनी दुसर्या वर्सा कांय विशयांनी नापास (बॅकलॉग) जाल्ल्या विद्यार्थ्यांक तिसर्या वर्सा खातीर प्रवेश न्हयकारला. बॅकलॉग आशिल्ले १ हजारां परस चड विद्यार्थी आसात. प्रवेश मेळ्ळो ना जाल्यार तांचे वर्स पिड्ड्यार जातलें. विद्यार्थ्यांचें वर्स पिड्ड्यार जावचें न्हय, हाका लागून प्रवेश दिवपाची मागणी आशिल्ल्याचें श्री. किंजवडेकार हांणी म्हणलें.
तोडगो काडपाचें आस्वासन
सगल्या महाविद्यालयांच्या प्राचार्यांची बसका आपोवन हाचेर चर्चा करतले. प्राचार्यांच्या सल्ल्यान प्रवेशा विशीं तोडगो काडपाचें आस्वासन कुलगुरू प्रा. हरिलाल मेनन हांणी दिल्ल्याचें विद्यार्थ्यांनी बसके उपरांत सांगलें.
प्रवेशाविशीं आशिल्ली सूट
पयलीं दोन वर्सां बॅकलॉग आसल्यार तिसर्या वर्सा खातीर प्रवेश दिवचो न्हय असो नेम २०१० वर्सा सावन आसा. फकत कोवीड काळांत सूट म्हणून बॅकलॉग आशिल्ल्या विद्यार्थ्यांक तिसर्या वर्सा खातीर प्रवेश दिल्लो. ही सूट कायम दवरचे ना. मात विद्यार्थ्यांक महाविद्यालया कडल्यान हाची कल्पना दिवंक ना. तशेंच नापास जाल्ल्या विशयांत पास जावपा खातीर पुरवणी परिक्षा घेतात. तरी अंदूं वर्सा खातीर बॅकलॉग विद्यार्थ्यांक प्रवेशांची सूट कायम दवरची, अशी मागणी विद्यार्थी मंडळान केल्ल्याचे अध्यक्ष विनय रावत हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
