भांगरभूंय | प्रतिनिधी
हैद्राबाद सावन गोंयांत परतून येतना काळाचो घालो
भांगरभूंय । प्रतिनिधी
पेडणें: हैदराबाद सावन गोंयांत परतून येतना पेडणेंच्या जोडप्याक अपघातांत मरण आयलें. बिजापूर कर्नाटक हांगा इर्टिगा मोटारीक जाल्ल्या भिरांकूळ अपघातांत बाजारपेठ पेडणें हांगासरलो विशाल संगराज बोंद्रें (31) आनी ताची घरकान्न वर्षा विशाल बोंद्रें (26) ह्या जोडप्याक मरण आयलें. हैदराबाद सावन गोंयांत परतून येतना हो अपघात जालो.
मेळिल्लें म्हायती प्रमाण, मोपा विमानतळार कार्गो स्केनर म्हूण निवड जाल्ल्या मयत वर्षाची भयण दिशा कांबळी ही हैद्राबादांत ट्रेनिंगे खातीर गेल्ली. तिची विचारपूस करपा खातीर आनी तिका पळोवपा खातीर मंगळारा जीए 11 ए 3738 हे इर्टिगा मोटारीन दिशाची आवय, भावोजी, भयण, दुसरी भयण साहिली आनी शेजारची एक बायल आनी तिचो ल्हान चलो तशेंच मरण पाविल्ल्यांची चली आनी गाडयेचो चालक हे सगले जाण हैद्राबादांत गेल्ले.
हे सगले जाण दिशा कांबळीक मेळून परतून गोंयांत येताले. बिजापूरांत पाविल्ले आसतना चालकाचो गाडये वयलो ताबो गेल्ल्यान गाडी रस्तो सोडून भायर गेली आनी लवंडली. अपघातांत वर्षा विशाल बोंद्रे आनी विशाल संगराज बोंद्रे ह्या जोडप्याक मरण आयलें.
सुदैवान गाडयेंत आशिल्लीं दोन ल्हान भुरगीं वाटावलीं. मरण आयिल्ली विशाल आनी वर्षा हांची धूव आनी शेजारचे बायलेचो एक ल्हान चलो आशिल्लो. तीं दोगांय वाटावली. जाल्यार वर्षाचे आवयक कमराक दुखापत जाल्या. तशेंच हेरांकूय किरकोळ दुखापत जाल्ल्याचें मयत वर्षाची भयण साहिली कांबळी हिणें सांगलें.
हो अपघात वसंत भागेवाडी बिजापूर पुलीस स्टेशनाचे शिमेंत जालो. पेडणें पुलीस स्टेशनाचे उपअधिक्षक सिद्धांत शिरोडकार हांणी बिजापूर पुलिसां कडेन संपर्क सादला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.