भांगरभूंय | प्रतिनिधी
37वे राष्ट्रीय खेळां सर्तींत येजमान गोंयच्या पंगडान सांघीक प्रदर्शनाच्या नेटार बास्केटबॉल मॅचींत तेलंगण पंगडाक हारोवन सेमी फायनलींत सुवात मेळोवपाची आपली आस्त कायम राखली. दादल्यांच्या गटांत ताणें 86-56 अशा फरकान जैत जोडलें.
गौरव चांदेल आनी जेसजुवा पिंटो हाणें दरेकी 21 गूण मेळयले, जाल्यार अणभवी महिपाल सिंगान 17 गुणांची कमाय केली. मॅच नावेलीच्या मनोहर पर्रीकार पर्रीकार इन्डोर स्टेडियमाचेर जाली.
दिल्ली पंगडा आड जाल्ले पयले मॅचींत गोंयाक हार घेवची पडिल्ली. ताका लागून सर्तींतलें आव्हान राखपा खातीर ताका तेलंगण पंगडा आडची मॅच जिखपाची गरज आशिल्ली.
गोंयान तेच दिश्टीन खेळ करून तेलंगण पंगडाच्या खेळगड्यांक रिंगचे दिकेन प्रवेश करपाक दिलो ना. ताका लागून पयल्याच टप्प्यांत गोंयाक 32-19 अशी आघाडी घेवप शक्य जालें. दुसऱ्या टप्प्यांत मात गोंयान दिल्ली आडचे मॅचींतलो अणभव मतींत घेवन कसलोच धोको पत्करूंक ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
