बाळ्ळे बालरथ बसीक अपघात, चार विद्यार्थी जखमी
भांगरभूंय | प्रतिनिधी
मडगांव, प्रतिनिधी ः कुंकळ्ळी वाठारांतल्या एका शाळेच्या बालरथ बसीक आयज सकाळीं सुमार 85 वरांचेर अपघात जालो. ह्या बालरथांतल्या 34 विद्यार्थ्यां मदले चार विद्यार्थी जखमी जाले. जखमी जाल्ल्या विद्यार्थ्यांक उपचारां खातीर भलायकी केंद्रात दाखल केला. विरोधी पक्षाचे फुडारी युरी आलेमाव हांणी जिल्लो प्रशासनाक हे विशीं म्हायती दिवन बेगोबेग दखल घेवपाची सुचोवणी दिल्या.
मेळिल्ले म्हायती प्रमाण, आयज सकाळीं सुमार 8 वरांचेर बाळ्ळे भलायकी केंद्रा लागसार हो अपघात जालो. कुंकळ्ळी वाठारांतल्या 34 विद्यार्थ्यांक शाळेंत व्हरतना एका वलताचेर बलरथाच्या चालकाचो गाडये वेलो ताबो सुटलो आनी बस रस्त्या कुशीक उमथली. हांतूत 4 विद्यार्थी जखमी जाल्यात. थंय धांवून आयिल्ल्या लोकांनी विद्यार्थ्यांक भायर काडले.
युरी आलेमाव हांणी जिल्लो प्रशासनाक ह्या अपघाताची म्हायती दिवन विद्यार्थ्यांचे सुरक्षेची जतनाय घेवपाची सुचोवणी दिली. कुंकळ्ळी पुलिसांक अपघाताची म्हायती मेळ्ळे बरोबर ते सुवातेर पावले चालकाचो गाडयेवेलो ताबो कसो सुटलो हांचे नेमके कितें कारण हाची चवकशी पुलिसांनी सुरू केल्या.
दोगांच्या तकलेक जखम
ह्या अपघातांत जखमी जाल्ल्यां मदीं आतां मेरेन 17 विद्यार्थ्यांक दक्षीण गोंय जिल्लो हॉस्पिटलांत उपचारा खातीर हाडल्यात. हातूंतल्या दोन भुरग्यांक तकलेक जखम जालां. तांकां वैजकी अधिकाऱ्यांच्या देखरेखी खाला दवरल्यात अशी म्हायती जिल्लो इस्पितळाचे जनसंपर्क अधिकारी सर्फराज हांणी दिल्या.
बालरथ बसींचे ऑडिट गरजेचें : युरी
बालरथ बसींचे ऑडिट करपाची मागणी केल्ली. बालरथाचे स्टेअरिंग लॉक जाल्ल्यान बाळ्ळे हो अपघात जालो. देखून सरकारान आतां तरी शिक्षणीक सुविधां कडेन लक्ष दिवचें. शाळेचो बसी, शाळा इमारतीचे देखरेखीचेर बगोबेग लक्ष दिवचें. दोन विद्यार्थ्यांचे तकलेक मार लागलो आनी सुमार 15 विद्यार्थ्यांक जिल्लो हॉस्पिटलांत दाखल केल्यात. बाळ्ळे भलायकी केंद्रांत दोतोर आनी सुविधांची उदरगत करपाची गरज आसा अशें युरी आलेमाव हांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
