भांगरभूंय | प्रतिनिधी
अॅड. शशांक नार्वेकरः लकी कुपनांचो निकाल जाहीर
भांगरभूंय । प्रतिनिधी
म्हापशें: म्हारगायेच्या ह्या दिसांनी सवाय दरांत बरो म्हाल मेळपाची सुवात म्हणल्यार ग्राहक सहकारी संस्था. फाटलीं 34- 35 वर्सां बार्देस बाजार गिरायकांक विवीध सुविधां वरवीं बरे तरेचो म्हाल योग्य दरांत दिवपाचो यत्न करता. हे खातीर हे संस्थे कडेन विस्वासाचें नातें निर्माण जालां. सर्तीच्या युगांत तिगपाक जाय जाल्यार हें नातें आनीक वाडपाक जाय. बार्देस बाजाराची ही सेवा गोंयांतल्या गांवागांवांनी पावपाक जाय, अशें नगरसेवक अॅड. शशांक नार्वेकार हांणी सांगलें.
बार्देस बाजार ग्राहक सहकारी सोसायटीच्या दिवाळी, नातलां आनी नव्या वर्सा निमतान आयोजीत लकी ड्रॉ वेळार अॅड. नार्वेकार मुखेल सोयरे म्हूण उलयताले. तांचे वांगडा मानाचे सोयरे म्हूण आदले केंद्रीय मंत्री अॅड. रमाकांत खलप, संस्थेचे आदले उपाध्यक्ष प्रा. रवीन्द्र फोगेरी, तशेंच अध्यक्ष निखिलचंद्र खलप, संचालक महादेव नाटेकार, एकनाथ नागवेंकार, बापू तुयेंकार आनी प्रमोद कर्पे हाजीर आशिल्ले.
सुरवेक अध्यक्ष खलप हांणी येवकार दिलो. अॅड. रमाकांत खलप हांणी संस्थापक ह्या नात्यान संस्थेच्या वावराचो नियाळ घेतलो. आदले उपाध्यक्ष प्रा. रवीन्द्र फोगेरी हांणी सहकारी संस्थेंत एकवटान कशे काम करतात आनी ताका लागून संस्था फायद्यांत चलता, अशी म्हायती दिली.
हाजीर आशिल्ल्या मानेस्तांचे हस्तुकीं लकी कुपनांचो ड्रॉ काडलो. संतोष बामणे हांणी आदार केलो. संचालक एकनाथ नागवेंकार हांणी सुत्रसंचालन केलें आनी ड्रॉचो निकाल जाहीर केलो. भाग्यवंत जैतिवंतांनी आपलीं इनामां 30 दिसां भितर व्हरचीं, असो उलो नागवेंकार हांणी मारलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
