भांगरभूंय | प्रतिनिधी
दुरुस्ती कामाक लागून तिळारी कानालांतलें उदक बंद
म्हापशें: तिळारी कानालाचें वर्सुकी दुरुस्तीचें काम हातांत घेतलां. हे खातीर कानालांतलें उदक बंद केल्ल्यान अस्नोडें, पर्वरी आनी चांदेल उदक शुद्धीकरण प्रकल्पांनी उदकाचो उणाव आसतलो. हाका लागून 11 नोव्हेंबर सावन बार्देस आनी पेडणें म्हालांत मर्यादीत उदका पुरवण तशेंच वेळापत्रकांतूय बदल जावपाची शक्यताय आसा.
महाराष्ट्र सरकाराच्या शिंपणावळ खात्यान तिळारी धरण ते अस्नोडें मजगतच्या कानालाचें वर्सुकी दुरुस्तीचें काम बिरेस्तार 10 वेर सावन हातांत घेतलां. हे खातीर कानालांतलें उदक बंद केलां. उदका स्रोत खात्यान अस्नोडें उदक शुद्धीकरण प्रकल्पाक लागपी कच्चें उदक आमठाणें धरण आनी पार न्हंयेंतलें जाल्यार चांदेल उदक शुद्धीकरण प्रकल्पाक बैलपार न्हंयेंतल्यान घेतात.
पूण वयल्या काळांत पर्यायी कच्चा उदकाचेर परिणाम जाल्यार लोकांची गैरसोय जावची न्हय म्हूण भौशीक बांदकाम खात्याच्या उदका पुरवण विभागान भौशीक नोटीस जारी केल्या. ह्या काळांत पेडणें आनी बार्देस म्हालांत मर्यादीत उदका पुरवण आसतली. तशेंच उदका पुरवण वेळापत्रकांत बदल लेगीत जावंक शकता अशें विभागान हे नोटिशींत नमूद केलां.
मजगतीं, पयलीं कानालाचे दुरुस्ती खातीर दोन म्हयन्यांचो काळ घेताले. पूण ह्या वेळार ह्या कालावधीचो काळ महाराष्ट्र सरकाराच्या शिंपणावळ खात्यान निश्चीत केल्लो ना. ताका लागून कितले दीस ह्या दुरुस्ती कामा खातीर लागतले आनी कानालांत परतून उदक केन्ना सोडटले हाचें वेळापत्रक सादर करूंक नाशिल्ल्यान उदका स्रोत खात्याचे अधिकारी गोंदळांत सांपडल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
